Fýtboldan Qazaqstan quramasynyń bas bapkeri Stanıslav Cherchesov Norvegıamen bolatyn mach aldynda baspasóz máslıhatyn ótkizip, jýrnalıser saýalyna jaýap berdi.
Reseılik maman Qazaqstan ulttyq quramasynyń aldynda naqty mindet bar ekenin jetkizdi, dep habarlaıdy aqshamnews.kz.
«Bizdiń aldymyzda naqty mindet bar: erteń Norvegıa quramasymen ótetin birinshi oıynǵa daıyndalý. Men daıyndyq barysynda klýbtarmen jáne oıynshylarmen belsendi aralasyp, olardyń formasy men jattyǵý barysyn baqylap otyramyn. Kimniń jaqsy formada ekenin anyqtaý úshin 25 fýtbolshyny shaqyrdym, onyń ishinde oıyn deńgeıi qandaı joǵary ekenin biletin tájirıbeli oıynshylar da bar. Bul bizdiń birinshi basqosýymyz. Ókinishke qaraı, tanystyrý jıynyn ótkize almadyq, sondyqtan qolymyzda barmen jumys istep jatyrmyz. Maqsat – maksımaldy nátıjege jetý. Biz endi S lıgasynda emes, V lıgasyndamyz, al qaǵaz júzinde qarsylastar bizden myqtyraq, muny moıyndaýymyz kerek. Erteń birinshi ári mańyzdy oıyn. Biz bárin basynan bastaımyz jáne Ulttar lıgasy arqyly álem chempıonatynyń irikteý kezeńine daıyndalýǵa bar kúshimizdi salamyz», - dedi Cherchesov.
Aıta keteıik, Qazaqstan men Norvegıa arasyndaǵy oıyn 6 qyrkúıekte Almatydaǵy «Ortalyq stadıonda» ÝEFA Ulttar lıgasynyń toptyq kezeńi aıasynda ótedi.