Sý resýrstary jáne ırrıgasıa mınıstrligi erekshe strategıalyq mańyzy bar sý sharýashylyǵy qurylystarynyń tizbesine tolyqtyrýlar engizý týraly Úkimet qaýlysynyń jobasyn ázirledi.
Atap aıtqanda, tizimge Shyǵys Qazaqstan oblysy Oba ózenindegi sý elektr stansıalary kaskadyn qosý josparlanyp otyr, dep habarlaıdy aqshamnews.kz.
Cala mınıstrliginiń málimetinshe, qaýly jobasy ashyq normatıvtik quqyqtyq aktilerdiń ınternet-portalynda ornalastyrylǵan. Jobany qabyldaý memlekettik búdjetten qosymsha shyǵyndardy qajet etpeıdi.
«Mınıstrlik usynǵan ózgerister sý tasqyny qaýpin azaıtý jáne óńirdegi eldi mekenderdi qorǵaý úshin tasqyn sýdy senimdi baqylaýdy qamtamasyz etýge baǵyttalǵan. Sondaı-aq, bul ózgeris azamattar men ónerkásip nysandaryn sýmen jabdyqtaýdy turaqtandyrý úshin jalpy syıymdylyǵy 500 mln tekshe metrge deıingi qoımalar keshenin daıyndaýǵa múmkindik beredi. Budan bólek, 3 myń gektardan astam aýyl sharýashylyǵy alqabyn sýarý jáne ekologıalyq taza elektr energıasynyń qosymsha kólemin óndirý úshin jaǵdaı jasalady», - dedi Sý resýrstary jáne ırrıgasıa mınıstrliginiń Sý sharýashylyǵy ımarattaryn damytý departamentiniń dırektory Qudaıbergen Qorǵanbaev .