Almatynyń Túrksib aýdanynda ınjenerlik jelilerdiń qurylys jobasy aıaqtalyp keledi
Qala ákimi Erbolat Dosaev Tómengi Besaryq shaǵyn aýdanynyń turǵyndaryna sýmen jabdyqtaý jáne sý burý jelileriniń qurylys merzimi men sapasyna qatysty suraqtarǵa jaýap berdi, dep habarlaıdy aqshamnews.kz.
Búgingi kúni josparlanǵan 115,5 km sý qubyrynyń 100 km-i, 31,8 km káriz jelisiniń 27,8 km-i salyndy. Jelilerge 4080 abonent, 67 kóshe qosylady. Almaty ákimi atap ótkendeı, asfálttaý jelilerdi tóseý men tekserýden keıin júrgiziledi, osylaısha jol jabynyn qaıtadan qazbaýǵa múmkindik týady. 45 kóshede asfált tóseldi, barlyǵy 280 myń sharshy metr jol jabynyn qalpyna keltirý josparlanǵan, sonyń 150 myń sharshy metri qalpyna keltirildi.
Turǵyndar atqarylyp jatqan jumystyń sapasyna nazar aýdarǵandyqtan, Erbolat Dosaev ınjenerlik jeliler boıynsha tehnıkalyq baqylaýdy júzege asyratyn kompanıamen birlesip baqylaýdy kúsheıtýdi tapsyrdy. Asfálttaý sapasyn Qalalyq mobıldilik basqarmasy men Jol aktıvteriniń ulttyq sapa ortalyǵy tekseredi. Sonymen qatar, merdigerge jaıaý júrginshilerdiń qaýipsiz qozǵalysyn qamtamasyz etý úshin jeke trotýarlardyń qurylysyn júrgizý qajettigi týraly eskertildi.
Qala ákimi qurylys jumystary 15 jeltoqsanǵa deıin aıaqtalatynyn atap ótti.
«Bul jobanyń jaǵdaıyn óte jaqsy bilemin. Injenerlik jelilerdi belgilengen merzimde sapaly túrde júrgizý bizdiń múddemiz ben turǵyndardyń múddesi. Bul kóshelerdiń asfálttalýyna da qatysty. Eger de jol jabyny shógip nemese búlinse, merdiger kepildik mindettemeleri aıasynda qalpyna keltirý jumystaryn júrgizedi. Turǵyndar kótergen barlyq másele boıynsha tapsyrmalar berildi, olar hattamamen bekitildi jáne meniń jeke baqylaýymda bolady», - dedi Erbolat Dosaev.
Aıta ketý kerek, Tómengi Besaryq shaǵyn aýdanynda sý qubyry men káriz jelilerin salý jobasy 2021 jyldan bastap Energetıka jáne sý sharýashylyǵy basqarmasynyń tapsyrysy boıynsha «Alvıs» jaýapkershiligi shekteýli seriktestigimen júzege asyrylýda. Ótken jyly materıaldardyń qymbattaýyna baılanysty joba 8 aı boıy túzetildi.