Almaty ákimi Erbolat Dosaev Túrksib aýdanynyń turǵyndarymen kezdesý barysynda metro qurylysy týraly suraqqa jaýap berip, jalpy qoǵamdyq kólikti damytý týraly aıtty.
Ol batys baǵytta «Qalqaman» stansıasynan keıin metro «Barlyq» bazaryna deıin jalǵasatynyn, onda iri kólik- aýysyp otyrý toraby qurylatynyn atap ótti.
«Sondaı-aq, áýejaıǵa qaraı tartý jobasy daıyndalýda. Kelesi jyly biz jumys qarqynyn jedeldetýdi josparlap otyrmyz. Jalpy, qalanyń kólik qańqasynyń Master josparyna sáıkes metro, LRT jáne BRT sıaqty jyldam qoǵamdyq kólik bizdiń basymdyǵymyz bolyp tabylady. Kelesi jyly iri jobalardy iske asyrý bastalady», - dedi megapolıs ákimi.
Erbolat Dosaev qalada 700 myńnan astam mashına tirkelgenin jáne kún saıyn oblystan 450 myńǵa jýyq mashına qalaǵa kiretinin atap ótti.
«Iaǵnı, joldarda mıllıonnan astam kólik júredi. Bizdiń mindetimiz - damyǵan qoǵamdyq kólikti jasaý. Adamdar jeke kólikke emes, avtobýsqa nemese metroǵa tańdaý jasaýy tıis. Sondyqtan, shyn máninde damyǵan qoǵamdyq kólik mobıldilikti, qaýipsizdikti, jaılylyqty arttyryp, ekologıany jaqsarta alatynyn kórgende aldaǵy eki jyl sheshýshi mánge ıe bolady», - dep atap ótti Erbolat Dosaev.