Almaty — eldegi eń kúrdeli, saıası belsendiligi joǵary qalalardyń biri. 2022 jylǵy Qańtar oqıǵalarynan keıin, 31 qańtarda Erbolat Dosaev qala ákimi bolyp taǵaıyndaldy. Onyń aldynda turǵan basty mindet — dúrbeleńnen keıingi qalany qalpyna keltirý boldy. Bul — ońaı tapsyrma emes. Úsh jyl ishinde Dosaev qandaı bastamalarymen este qaldy? Tolyǵyraq aqshamnews.kz materıalynda.
Ekonomıka: 2 trıllıon teńgeden asqan búdjet
Erbolat Dosaevtyń ákimdikke kelgeli Almaty ekonomıkasynda biraz ózgeris boldy. 2025 jyly qalanyń búdjeti alǵash ret 2,2 trln teńgeden asyp, 2022 jylmen salystyrǵanda 2,1 ese ósti.
2024 jyly jan basyna shaqqandaǵy JÓÓ 27 557 AQSH dollar bolyp, 9,4%-ǵa artty. Almaty - ınvestısıa úshin eldegi eń tartymdy óńirlerdiń biri. Qalada quny 1,5 trln teńge bolatyn 95 joba iske asyrylyp jatyr, 2025 jyly 473 mlrd teńgege 33 joba júzege asyp, 10 myń jumys orny ashylady.
Shaǵyn jáne orta bıznes (SHOB) JÓÓ-niń 60,3% bolyp, negizgi jumys berýshi sektor bolyp otyr – munda 972 myń adam eńbek etedi. 2025 jylǵy mamyrǵa qaraı belsendi SHOB sany 378,9 myńǵa jetip, 7,4%-ǵa ósti.
Almaty – jasyl qala
2025 jyldan beri qalada 2 myń iri aǵash, 20 myńnan asa kóshet jáne 10 myń buta otyrǵyzyldy. Keıingi eki jylda 1 mıllıonnan asa jasyl jelek egildi.
Zańsyz qurylystarmen kúres kúsheıip, 2022 jyldan beri 88 nysan súdirildi. Qurylysqa qatysty jańa erejeler qabyldandy – bul qaýipsiz jáne jaıly qalalyq orta qalyptastyrýǵa baǵyttalǵan.
"Halyq qatysatyn búdjet" baǵdarlamasy aıasynda barlyq aýdanda aýlalar jóndelip, jaryqtar, oryndyqtar men alańdar ornatyldy, parkter men jaıaý júrginshi aımaqtary abattandyryldy.
Demalys oryndary kóbeıdi: ózen jaǵalaýlarynda serýendeý aımaqtary jasalyp, qalada táýlik boıy jumys isteıtin ınklúzıv kitaphanalar ashyldy. Qoǵamdyq oryndarda ózine-ózi qyzmet kórsetetin kitaphanalar ornatyldy.
Barlyq jańa nysandar ámbebap dızaın qaǵıdattarymen salynyp jatyr – qarttar, múmkindigi shekteýli jandar men ata-analar úshin yńǵaıly.
Saıran sý qoımasynyń jaǵalaýy tolyq beıimdelgen. 2025 jyly 32,5 myń ınfraqurylym nysanynyń tólqujaty jasalady, al 2030 jylǵa deıin 3 100 áleýmettik nysan ınklúzıa talaptaryna saı beıimdelmek.
Naýryzda Natalá Sas atyndaǵy teatrdyń aýqymdy qaıta jóndeý jumystary bastaldy.
Kólik jáne jol: BRT dáýiriniń bastalýy
Almatyda kólik júıesin tıimdi ári qoljetimdi etý úshin 2030 jylǵa deıingi kólik master-jospary qabyldandy. Negizgi maqsat – qoǵamdyq kólikpen júretinderdiń úlesin 64%-ǵa jetkizý.
Keıingi 3 jylda 2 myńdaı avtobýs jańartyldy, ekologıalyq avtobýstar úlesi 53,7%-dan 70%-ǵa ósti. 2025 jyly Raıymbek dańǵyly men Jeltoqsan kóshesinde BRT (jeke jolaq) qurylysy bastaldy – bul avtobýstardyń qozǵalysyn jedeldetedi.
Jyl saıyn qalada shamamen 250 shaqyrym jol jóndeledi.
Týrızm: Almaty – sheteldikterdiń №1 tańdaýy
Almaty týrızminiń qala ekonomıkasyna qosqan úlesi – 3,9%. 2024 jyly 2,34 mln týrıs keldi (ósim – 14,8%), onyń ishinde sheteldikter – 686,3 myń adam (elge kelgen árbir ekinshi sheteldik Almatyny tańdaǵan).
Týrısik qyzmet kólemi – 96,3 mlrd teńge, al qala búdjetine túsken kiris – 90,7 mlrd teńge (2023 jylmen salystyrǵanda 1,9 ese kóp).
2025 jyly týrıs sany 2,5 mln adamǵa jetedi dep kútiledi.
Áleýmettik sala: mektep avtobýsy men "Shabyt" ortalyǵy
Almatyda "Mektep avtobýsy" jobasy iske qosylyp, shalǵaı aýdannan 16 myńnan asa oqýshy mektepke qaýipsiz qatynaý múmkindigine ıe boldy. Mektepter bir aýysymdy formatqa kóship jatyr. Jańa mektepter "Jaıly mektep" ulttyq jobasy aıasynda jáne jergilikti búdjet esebinen salynyp, qoldanystaǵy mektepterge qosymsha qurylys júrgizilip jatyr.
Bostandyq aýdanynda – zamanaýı Oqýshylar úıi, Almaly aýdanynda – "Shabyt" balalardy damytý ortalyǵy ashyldy.
Densaýlyq saqtaý salasynda BMSK-nyń biryńǵaı standarty engizilip, 4 alǵashqy kómek ortalyǵy jáne 1 emhana salyndy. Jedel járdem avtoparkiniń tozýy 70%-dan 40%-ǵa deıin azaıdy. Keıingi 3 jylda 103 jańa jedel járdem kóligi satyp alyndy.
Sıfrlandyrý: úlken qala – úlken derekter
Almaty – Qazaqstandaǵy IT-qyzmetterdiń 52%-yn usynatyn ortalyq. Qaladaǵy 50 myń beınebaqylaý kamerasy men jasandy ıntellekt júıesi – qaýipsizdiktiń jańa deńgeıi. Bul júıe endi basqa óńirlerge de úlgi bolyp otyr.
Erbolat Dosaev týraly ne belgili?
Erbolat Dosaev 1970 jyly 21 mamyrda Almatyda dúnıege keldi. 1987 jyly Almatydaǵy Orymbek Jáýtikov atyndaǵy Respýblıkalyq fızıko-matematıkalyq mektep-ınternatyn bitirdi. Keıin Almaty energetıkalyq ınstıtýtyn, Baýman atyndaǵy Máskeý Memlekettik tehnıkalyq ýnıversıtetin támamdaǵan.
Eńbek ótili
Erbolat Dosaevtyń qyzmettik joly 1997 jyly "Turan Álem Banki" JAQ basqarma tóraǵasynyń orynbasary qyzmetimen bastalǵan. Keıin osy jyly "ATF Bank" JAQ basqarma tóraǵasy laýazymyn atqarǵan. 1998 jyly jas Erbolat Dosaev el premer-mınıstriniń keńesshisi bolyp taǵaıyndalady.
- 1998 jyly QR energetıka, ındýstrıa jáne saýda vıse-mınıstri laýazymyn atqarǵan;
- 2000 jyly – Qazaqstan Respýblıkasy Qarjy vıse-mınıstri;
- 2001 jyly Qazaqstan Damý banki dırektorlar keńesiniń tóraǵasy bolǵan;
- 2001–2003 jyldary QR Tabıǵı monopolıalar, básekelestikti qorǵaý jáne shaǵyn bıznesti qoldaý agenttiginiń tóraǵasy retinde qyzmet atqarǵan;
- 2003–2004 jyldary – QR qarjy mınıstri; Qazaqstandaǵy Eýropalyq qaıta qurý jáne damý bankiniń basqarýshysy; QR Ulttyq bankiniń basqarma múshesi;
- 2004–2006 jyldary – QR densaýlyq saqtaý mınıstri;
- 2006–2012 jyldary «Qazınvestbank» AQ Dırektorlar keńesiniń tóraǵasy;
- 2012 jylǵy 25 qyrkúıekten bastap – QR ekonomıkalyq damý jáne saýda mınıstri;
- 2013 jylǵy 16 qańtardan bastap – QR ekonomıka jáne búdjettik josparlaý mınıstri;
- 2014 jylǵy 6 tamyzda QR Prezıdentiniń № 880 jarlyǵymen QR ulttyq ekonomıka mınıstri bolyp taǵaıyndaldy.
- 2015 jylǵy 30 sáýirde QR Prezıdentiniń № 5 jarlyǵymen QR ulttyq ekonomıka mınıstri bolyp qaıta taǵaıyndaldy.
- 2016–2017 jyldary – "Báıterek" ulttyq holdıńiniń basshysy.
- 2017 jylǵy 29 tamyzda Qazaqstan Respýblıkasy Premer-mınıstriniń orynbasary bolyp taǵaıyndaldy.
- 2017 jylǵy 29 qarashadaǵy Qazaqstan Respýblıkasy Investısıalar jáne jańa tehnologıalar mınıstrdiń mindetin atqarýshy T. Toqtabaevtyń "Báıterek" ulttyq basqarýshy holdıńi" aksıonerlik qoǵamy dırektorlar keńesiniń quramy týraly" № 824 buıryǵyna sáıkes "Báıterek" ulttyq basqarýshy holdıńi" aksıonerlik qoǵamy Dırektorlar keńesiniń quramyna saılandy.
- 2019 jylǵy 25 aqpanda Elbasynyń jarlyǵymen QR Ulttyq bank tóraǵasy bolyp taǵaıyndaldy.
- 2022 jylǵy qańtarda Almaty ákimi bolyp taǵaıyndalǵan edi.