1 maýsym – Balalardy qorǵaý kúnine aıryqsha mán beriledi. Búgingi balalar – bolashaǵymyzdyń kelbeti. Balalarǵa otbasynda, mektepte jáne qoǵamda aqaýsyz tálim-tárbıe berý, qaýipsiz orta jaratý, tulǵalyq qalyptasýyna jaǵdaı jasaý tutas qoǵamnyń ortaq atqaratyn mindeti.
Búgin qaladaǵy bilim berý mekemelerinde balalardyń quqyqtyq saýatyn arttyrý, qaýipsizdikti máselelerine kóńil aýdartý maqsatynda mańyzdy is-sharalar ótti.
Bostandyq aýdanyndaǵy №70 mektep balalardyń quqyqtyq tanymyn tereńdetý isin qyzyqty saıys túrinde uıymdastyrdy. "Balalar qaýipsizdigi – basty nazarda" dep atalatyn kvest-saıysyna túrli synyp oqýshylary qatysyp, quqyq pen qaýipsizdik jáne tártip taqyryptarynda óz bilimderin kórsetti.
Oqýshylar saıys barysynda ózderin polısıa ókilderi retinde kórsetip, qaýipsizdik pen tártiptiń, qoǵam tynyshtyǵynyń mańyzdy kepilderin, quqyqtyq taqyryptardy talqylady. Polıseı formasyn kıgen oqýshylar ózderin qoǵam amandyǵyn saqtaýshy retinde sezine aldy.
Balalarǵa zań men tártipti, túrli ortadaǵy qaýipsizdik máselelerin túsindirýde ózara aqyl-oı saısy formatyn qoldanýdyń nátıjesi joǵary dep sanaıdy mektep ujymy. Mekteptegi bul mańyzdy is-sharaǵa ıývenaldy polısıa ókilderi de qatysyp, saıyskerlerdi baǵalady jáne jeńimpazdardy marapattady.
№70 mekteptiń dırektory Zaýresh Beısembaeva ár mekteptiń pedagogıkalyq ujymynyń basty mindeti – árbir balanyń qaýipsizdigin qamtamasyz etý ekenin, ol úshin keshendi tásil qajettigin basa aıtyp ótti. Aıtalyq, mekteptiń tehnıkalyq qaýipsizdik quraldarymen (kúzet, týrnıketter, beınekameralar) jabdyqtalýy – bul Almaty qalasy Bilim basqarmasy tarapynan barlyq mektepterde tolyq qamtamasyz etilgenin basa belgiledi. Sonymen qatar, oqýshylarmen jáne olardyń ata-analarymen de jumys júrgizilýi qajet dep sanaıdy Záýresh Tursynbekqyzy.
"Quqyqtyq tártipti qamtamasyz etý maqsatynda mektep Bostandyq aýdanynyń PB-men tyǵyz yntymaqtastyqta jumys isteıdi. Olar 6 "Á" synyp oqýshylarynan quralǵan "Jas Saqshy" tobyn uıymdastyrdy. Bıylǵy oqý jyly barysynda mektep ınspektorlary úlken jumys atqardy. "Jas Saqshy" tobynyń oqýshylary bastaýysh synyp oqýshylarymen jumys júrgizip, olardy sabaqtan qalmaýǵa, keshikpeýge, mektep erejelerine baǵynýǵa, qaýipti zattardy ákelmeýge, mektep múlkin saqtaýǵa, mektep oqýshylary men qyzmetkerlerin qurmetteýge úıretedi. Balalardyń polıseı formasyn kıýi – óz aldyna, olarǵa polıseı beınesine saı bolýǵa degen jaýapkershilik júkteıdi", - deıdi №70 mektep dırektory Záýresh Beısembaeva.