QR Eńbek jáne halyqty áleýmettik qorǵaý mınıstrliginde birinshi vıse-mınıstr Aqmádı Sarbasovtyń tóraǵalyǵymen óndiristik jaraqattaný deńgeıin tómendetý jáne jumyskerlerdiń eńbek quqyqtaryn qorǵaýdy kúsheıtý boıynsha onlaın-keńes ótti.
İs-sharaǵa Eńbekmıni Memlekettik eńbek ınspeksıasy komıtetiniń, QR Kásipodaqtar federasıasynyń jáne «PARYZ» QR Jumys berýshiler Ulttyq Konfederasıasynyń ókilderi qatysty, dep habarlaıdy aqshamnews.kz.
Keńes barysynda Qazaqstan Respýblıkasynda 2024-2030 jyldarǵa arnalǵan qaýipsiz eńbek tujyrymdamasyn iske asyrý barysy, atap aıtqanda kásiporyndarǵa táýekel synybyn bere otyryp, kásiptik táýekelderdi ıntegraldy baǵalaý rásimine tolyqqandy kóshýge baǵyttalǵan quraldardy engizý jáne jumystar júrgizý qaraldy.
«Qazirgi ýaqytta qoldanysqa engizilgen Kásiporyndardyń sıfrlyq kartasy naqty ýaqyt rejıminde kásiporyndardaǵy táýekelderdi boljaýǵa jáne aldyn alý sharalaryn júzege asyrýǵa múmkindik beredi. Búginde 91,1 myń kásiporyndaǵy jaǵdaıǵa monıtorıń júrgiziledi. Osyndaı aldyn alý sharalarynyń arqasynda joǵary táýekel aımaǵynan 2,8 myń kásiporyn shyǵaryldy, olarda jalpy 70 myńnan astam jumysker bar.», – dedi Aqmádı Sarbasov.
Ol sondaı-aq bıyl Halyqaralyq eńbek uıymymen birlesip Qazaqstannyń taý-ken óndirý sektorynda eńbek qaýipsizdigi men gıgıenasyna járdemdesý jónindegi arnaıy joba iske qosylǵanyn habarlady.
Sonymen qatar keńeske qatysýshylar qyzmetkerlerdiń eńbek quqyqtaryn qorǵaýdy kúsheıtý, Qazaqstanda eńbekti qorǵaý mádenıetin arttyrý, eńbek zańnamasyn saqtaý qajettiligi jáne t. b. boıynsha yqtımal sharalardy talqylady.