Prezıdentke óńirdiń áleýmettik-ekonomıkalyq damýy jáne buǵan deıin berilgen tapsyrmalarynyń oryndalý barysy baıandaldy.
Oblys ákimi ótken jyldyń qorytyndysy boıynsha negizgi salalarǵa tartylǵan ınvestısıa men óndiris kóleminiń óskenin atap ótti, dep habarlaıdy aqshamnews.kz.
Jalpy kólemi 400 myń sharshy metrden astam turǵyn úı paıdalanýǵa berilip, 46 jańa óndiris orny iske qosylǵan.
Qasym-Jomart Toqaevqa shaǵyn jáne orta bıznesti qoldaý sharalary, ınfraqurylymdy jańǵyrtý, jańa áleýmettik nysandar salý jaıynda aqparat berildi. Nurymbet Saqtaǵanovtyń aıtýynsha, týrızm, sıfrlandyrý salalaryn, kólik-logıstıka sektory men agroónerkásip keshenin damytýǵa basa nazar aýdarylady.
«Aýyldyq densaýlyq saqtaýdy jańǵyrtý» ulttyq jobasy aıasynda 18 nysan salynyp, 6 medısınalyq mekemege kúrdeli jóndeý júrgizildi. «Jaıly mektep» ulttyq jobasy boıynsha 5 bilim oshaǵy paıdalanýǵa berildi. Oqýshy oryndarynyń tapshylyǵyn azaıtý úshin 7 mektep boı kóteredi.
Memleket basshysyna Jumysshy mamandyqtary jylyna oraı kásiporyndardyń suranysy negizinde qurylys, aýyl sharýashylyǵy, avıasıa, energetıka jáne sý kóligi salalary boıynsha jańa bilim berý baǵdarlamalary ashylatyny jóninde aıtyldy. Eńbekkerlerdi qoldaý maqsatynda «Otbasy bankimen» birlesip, óńirlik «Shyǵys mamany» jeńildetilgen ıpotekalyq baǵdarlamasy iske qosyldy.
Oblys ákimi óńir turǵyndaryn tolyǵymen taza aýyz sýmen qamtamasyz etý jónindegi mindet jyl sońyna deıin oryndalatynyn jetkizdi. Bul baǵytta quny 14 mıllıard teńge bolatyn 8 joba júzege asyrylady.
Aldaǵy eki jylda óńirge keminde 1,5 trıllıon teńge ınvestısıa tartý, 700 myń sharshy metrden astam turǵyn úı jáne 28 áleýmettik nysan salý, sondaı-aq uzyndyǵy 600 shaqyrymnan astam joldy jóndeý josparlanyp otyr.
Prezıdent oblys ekonomıkasyn ártaraptandyrý, qaıta óńdelgen ónim eksportyn keńeıtý jáne ınvestısıa tartý jumystaryn kúsheıtýdi tapsyrdy. Qasym-Jomart Toqaev óńirdegi ekologıalyq máselelerdi sheshý jáne kólik ınfraqurylymyn jaqsartýǵa basa mán berý kerek ekenine toqtaldy.