Soltústik Qazaqstan oblysyna Muhammed Paıǵambardyń múbárak shashy ákelindi.
«Habar 24» málimetinshe, arnaıy qutyǵa salynǵan asyl jádiger ýaqytsha ıslam mádenıeti mýzeıine qoıylǵan. Paıǵambardyń shashy qazir Shymkent turǵynynyń qolynda eken. Erte kezderi ony ózbekstandyq ǵalymdar syılaǵan. Arnaıy qujaty da bar. Al ol "Tasattyq" namazy oqylǵan kezde óńirge bereke ákelsin degen nıetpen jetkizilgen. Búginde elimizdiń soltústiginde aptap ystyq. Aýa-raıy 35 gradýstan tómendemeı tur. Sondyqtan musylmandar qaýymy Alladan jańbyr surap, dinı rásim uıymdastyryp jatyr.
«Ámir Temirdiń kezinde qyzmet qylǵan úlken ǵulama kisilerdiń urpaqtarynan urpaqtaryna, atalarynan jetip otyrǵan, saqtap otyrǵan. Bul tek bir kisiniń úıinde turmaýy kerek. Halyq kórýi kerek. Halyq sol jerde salaýat aıtýy kerek. Sony kórip, paıǵambarǵa degen saǵynyshyn sol jerde basýy kerek», - dedi «Qazaqstan qajylar qaýymdastyǵy»Túrkistan oblysy fılıalynyń tóraǵasy Qalıolla Madjanov.
«Elge duǵa jasaý, jańbyr tileý. Eginimiz, ekken daqyldarymyz bitik shyqsyn degen maqsatta osy "Tasattyq" namazyn oqyǵaly otyrmyz. Endi, álbette, bul istiń berekesin arttyrýdaǵy maqsaty - Paıǵambarymyzdyń múbárak shashy. Arnaıy aldyrtyp otyrmyz. Paıǵambarymyzdyń árbir júrgen jeri berekeli bolǵan ǵoı. Sol bir berekesi tıe me degen maqsat. Adamdardyń nıetine baılanysty. "Tasattyq" búgin qalamyzda bolady», - dedi Soltústik Qazaqstan oblysynyń bas ımamy Hamzat Qajymuratuly.