Elimizdiń segiz óńirinde jergilikti aýqymdaǵy tótenshe jaǵdaı rejımi saqtalýda. Aqtóbe oblysyndaǵy eki eldi meken áli de kólik qatynasynsyz otyr. Turǵyndar azyq-túlikpen jáne dári-dármektermen qamtamasyz etilgen.
3 óńirde kúıdirgi kómilgen 10 oryndy sý basqan. Tıisti qyzmetter jergilikti jerde jedel dezınfeksıalaý sharalaryn júrgizip jatyr.
«Qazirgi ýaqytta elimizdegi sý tasqyny jaǵdaıy jalpy turaqtanyp keledi. Osy aptada Atyraý oblysynda sý tasqynynyń sharyqtaý shegi bolady dep boljanǵan. Qazir Jaıyq ózenindegi sý deńgeıi Inderbor jáne Mahambet sý beketterinde qaýipti belgilerden asyp tústi. Sý tasqynyna qarsy is-sharalardy júrgizý úshin 7 myńnan astam adam jáne 1900 birlik tehnıka, onyń ishinde 6 áýe kemesi jumyldyryldy. Oǵan TJM, polısıa, Ulttyq ulan, Qorǵanys mınıstrligi jáne jergilikti atqarýshy organdardyń kúshteri men quraldary tartylyp, jeke uıymdar men eriktiler qatysýda», — dedi Qanat Bozymbaev.
Sý basý aımaqtarynan 119 myńnan astam adam qaýipsiz jerge kóshirildi, onyń 44 myńy – balalar. Búgingi tańda 55,6 myń adam óz úılerine oraldy. Evakýasıa beketterinde shamamen 5 myń adam qaldy, 58 myńnan astam turǵyn týystarynyń úıine ornalasqan.
Sý tasqynynyń saldarynan elimizde 12 908 turǵyn úı sý astynda qalǵan, onyń ishinde úsh óńirde – Aqtóbe, Atyraý jáne Soltústik Qazaqstan oblystarynda 264 úı áli de sý astynda qalyp otyr.
Sondaı-aq 25 921 saıajaı ýchaskesi sý astynda qaldy, onda 18 025 saıajaı úıi ornalasqan.
Otyrys barysynda vıse-premer sý tasqynynyń saldaryn joıýǵa qatysyp jatqan iri kompanıalar men bıznesmender jaıynda aıtyp ótti. Atap aıtsaq, Aqmola oblysynda Integra Construction jáne RG Gold demeýshilik kómek kórsetedi. Aqtóbe oblysynda – «Bolat Ótemuratov qory», «BI Group» AQ jáne ERG kompanıalar toby.
- Batys Qazaqstan oblysy boıynsha Astana Motors kompanıalar toby, BI Group AQ, Jusan bank, «Bank Sentr kredıt» AQ, «QazAzot» JSHS jáne basqalary demeý kórsetetin bolady.
- Qostanaı oblysy boıynsha – ADD Capital, ERG, «Allúr» jáne «AgromashHoldıng», «Bazıs-A», sondaı-aq RG Brands kompanıalary.
- Soltústik Qazaqstan oblysy boıynsha – «Qazaqmys» korporasıasy, Kaspi.kz AQ, KAZ Minerals toby óńir úshin demeýshilik kómek kórsetýde.
- Atyraý oblysyndaǵy sý tasqynynyń saldaryn T. Qulybaev pen Q. Raqyshev kompanıalary esebinen joıý josparlanyp otyr.
- Búgingi tańda 20 600 otbasy 100 AEK mólsherinde birjolǵy tólem aldy. Tólengen qarajattyń jalpy somasy – 7,5 mlrd teńge.
- 680 otbasy keltirilgen materıaldyq shyǵyn úshin 362 mln teńge somasynda ótemaqy aldy.
- 568 otbasy turǵyn úıdi jóndeýge jáne qalpyna keltirýge 710 mln teńge somasynda ótemaqy aldy.
«Óńirlerde zalaldy baǵalaý jáne ony óteý jumystary jalǵasýda. Jaǵdaı turaqty baqylaýǵa alynǵan», — dep túıindedi vıse-premer.