Oǵan qazaqstandyq 23 iri jumys berýshi qatysyp, 50-den astam mamandyq boıynsha 1320 bos jumys ornyn usyndy.
QR Eńbek jáne halyqty áleýmettik qorǵaý mınıstri Tamara Dúısenova 27-29 maýsym aralyǵynda ótetin Elektrondyq eńbek bırjasyndaǵy alǵashqy onlaın eńbek jármeńkesin ashty, dep habarlaıdy Almaty-akshamy.kz
Mınıstr óziniń quttyqtaý sózinde eńbek jármeńkesi jas mamandarǵa otandyq ekonomıkanyń flagmany sanalatyn kásiporyndarǵa jumysqa ornalasýǵa biregeı múmkindik beretinin atap ótti.
«Elektrondyq eńbek bırjasynyń arqasynda Qazaqstannyń túkpir-túkpirinen kelgen 1 myńnan astam jastyń elimizdiń iri kásiporyndary usynǵan 50-den astam kásipti qamtıtyn 1320 bos orynǵa jumysqa ornalasý múmkindigi bar. Osy eńbek jármeńkesin qoldaǵan barlyq kompanıalarǵa alǵysymdy bildiremin. Osyndaı is-sharaǵa alǵash ret qatysyp otyrǵan jastarǵa: asyqpańyz, qoryqpańyz, búgin sizdiń kúnińiz», – dedi Tamara Dúısenova.
27 maýsym kúni eńbek jolyn endi bastaǵaly otyrǵan jas mamandarǵa arnalǵan eńbek jármeńkesi aıasynda «Tıimdi jumys izdeý» taqyrybynda master-klass uıymdastyrylady, onda qatysýshylarǵa mamandar túıindemeni qalaı jazý kerektigin, jumys berýshilermen kezdesýde ózin qalaı ustaý, qandaı sátterge nazar aýdarý qajet ekenin úıretedi.
27-29 maýsym aralyǵynda ár jumys berýshi óz kompanıasyn tanystyrady. Onda jumys sharttary, ashyq bos jumys oryndary, jumysqa ornalasý erekshelikteri jáne t.b. týraly aıtylady. Birqatar jumys izdeýshimen tikeleı efırde onlaın-áńgimelesý ótkiziledi.
Onlaın eńbek jármeńkesi aıasynda bos jumys ornyn usynǵan jumys berýshilerdiń arasynda Eýrazıalyq topqa (ERG) jáne Respýblıkalyq taý-ken óndirý jáne taý-ken metalýrgıa kásiporyndary qaýymdastyǵyna kiretin kásiporyndardy, Kaspi.kz, «Qazaqstan Halyq banki» AQ, «KATKO» BK JSHS, «Ernst & Young Kazakhstan» JSHS, «Evrazıa grýpp Kazahstan» JSHS, «Magnum Cash & Carry» JSHS, «Pervoe kredıtnoe búro» JSHS kompanıalaryn jáne taǵy basqalaryn atap ótýge bolady.
Aldaǵy ýaqytta osyndaı jármeńkeler halyqtyń túrli toptary úshin aı saıyn uıymdastyrylady.