Úkimet Densaýlyq saqtaý mınıstrligi arqyly analar men jańa týǵan nárestelerge medısınalyq kómek kórsetý sapasyn arttyrýǵa baǵyttalǵan sharalar keshenin júzege asyryp keledi.
Bosandyrý qyzmeti mamandarynyń bilikti ári úılesimdi jumysynyń nátıjesinde 2024 jyly 367 myń áıel sátti bosandy. Prenataldy skrınıngpen qamtý 90%-dy qurady, dep habarlaıdy aqshamnews.kz primeminister.kz-ke silteme jasap.
Jańa medısınalyq tehnologıalardy engizý jáne hattamalardy jetildirý neonataldy ólim-jitimdi 19%-ǵa tómendetýge, sondaı-aq sońǵy 10 jylda nárestelerdiń shetinep ketýin 6,7%-ǵa jáne ana ólimin 11,4%-ǵa azaıtýǵa múmkindik berdi. Týa bitken aqaýlardy erte anyqtaý úlesi 10%-ǵa ósti.
Genetıkalyq aýrýlar men týa bitken aqaýlardy erte anyqtaý maqsatynda 15 perınataldy ortalyqta «Bir kúndik klınıkalar» ashyldy. Búgingi tańda 50 myńnan astam júkti áıel tekserýden ótti. Nátıjesinde, 7 myńnan astam áıelde uryqtyń damýyndaǵy aqaýlar anyqtaldy. Perınataldy ortalyqtar bazasynda «Uryq medısınasy» jobasy da júzege asyrylýda, onyń sheńberinde 37 jatyrishilik ota jasaldy.
Jastar men bala týýǵa qabiletti jastaǵy áıelderdiń reprodýktıvti densaýlyǵyn saqtaý maqsatynda arnaıy iske qosylǵan «Analar saýlyǵy» baǵdarlamasy sheńberinde júktilikti josparlaǵan árbir áıel densaýlyq jaǵdaıyn anyqtaý úshin medısınalyq tekserýden ótýine múmkindik jasaldy. Akýsherlik-gınekologıalyq kómektiń 25 klınıkalyq hattamasy ózektendirildi.
Akýsherlik salada ınovasıalyq tehnologıalardyń úsh túri engizildi. Mamandardyń biliktiligin arttyrý sheńberinde 2 myńnan astam akýsher-gınekolog, 400 reanımatolog oqytyldy jáne 100 úılestirýshi daıarlandy.
Bosandyrý jáne ana men balaǵa kórsetiler qyzmetti damytýmen qatar, memlekettiń júıeli kúsh-jigeri ambýlatorıalyq dári-dármekpen qamtamasyz etýdi jetildirýge baǵyttalǵan.
Densaýlyq saqtaý mınıstrligi halyqtyń sapaly jáne qaýipsiz dárilik zattarǵa úzdiksiz qol jetkizýi úshin birqatar qadam qabyldady. 2024 jyldyń qorytyndysy boıynsha 2,9 mln naýqas tegin dári-dármekpen qamtamasyz etildi. Dári-dármekterdi tıimdi paıdalaný úshin stasıonarlarda 78 gospıtáldyq farmasıa bólimshesi ashyldy. Preparattardy qabyldaýdy derbestendirilgen esepke alýdyń jańa ádistemesi engizildi.
Dári-dármekterdiń shekti baǵalary men ústemelerin retteý erejelerine ózgerister engizildi, bul ambýlatorıalyq qamtamasyz etý sheńberinde de, bólshek dárihana jelisinde de dárilik zattardyń qunyn tómendetýge múmkindik berdi.