Premer-mınıstr Oljas Bektenovtiń tóraǵalyǵymen ótken Úkimet otyrysynda elimizdegi sý tasqyny jaǵdaıyna qatysty másele qaraldy.
Jalpy elimizde sý tasqyny kezeńiniń turaqty ótýi baıqalady, dep habarlaıdy aqshamnews.kz.
Aqtóbe, Atyraý, Batys Qazaqstan jáne Qostanaı oblystarynda ýaqtyly qabyldanǵan sharalar úılerdi sý basýyna jáne osy óńirlerdiń turǵyndaryna zıan keltirýge jol bergen joq. Sonymen qatar Soltústik Qazaqstan oblysyndaǵy Esil ózeninde sý deńgeıiniń kóterilýi boljanýda. Shyǵys Qazaqstan oblysynyń taýly aýdandarynda áli de 50%-ǵa jýyq qar jatyr.
Aqmola oblysynda sáýir aıynyń basynda 100-den astam turǵyn úı sý astynda qaldy. Qazir ahýal turaqtaldy, qaýip seıildi dep aıtýǵa bolady. Tosyn jaǵdaıǵa eldi mekenderdi qorǵaý boıynsha ınjenerlik jumystardyń durys júrgizilmeýi, sý tasqynyna qarsy is-sharalardy josparlaý men oryndaýdyń sapasyz júrgizilýi sebep bolǵany ataldy. Máselen, Eski Qalqutan aýylynda Qalqutan ózenin tazartý, jaǵalaýyn bekitý jáne tereńdetý jumystary 3 shaqyrymdaı ǵana ýchaskede júrgizilgen. Al joba boıynsha 11 shaqyrym bekitilýge tıis bolatyn. Sonymen qatar Makınsk qalasyna da sý jaıyldy.
«Aıta keteıik, óńirde dál osy eldi mekenderdi jyl saıyn sý basady. Demek, Aqmola oblysynda qabyldanyp jatqan sharalar tıimsiz. Marat Muratuly, jospardy qaıta qarap, bıyl barlyq qajetti jumystardy iske asyryńyz. Baspanalary men jer telimderi sý astynda qalǵan turǵyndarǵa járdemdesip, kómek kórsetińizder. Tótenshe jaǵdaılar mınıstrligine múddeli memlekettik organdarmen birlesip, sý tasqyny jaǵdaıyna táýlik boıy monıtorıń júrgizýdi jalǵastyrýdy tapsyramyn. Kúshter men quraldar árdaıym jedel áreket etýge daıyn bolýy tıis», — dep atap ótti Oljas Bektenov.
Úkimet otyrysy sońynda Premer-mınıstr Oljas Bektenov mınıstrlikter men ákimdikterge birqatar tapsyrma berdi:
- Aqmola, Abaı, Shyǵys Qazaqstan jáne Soltústik Qazaqstan oblystarynyń ákimdikteri sý tasqynyna baılanysty jaǵdaıdyń ýshyǵyp ketýine jol bermeý úshin barlyq shara qabyldasyn. Jaýapkershilikpen ári shuǵyl qımyldap, ýákiletti memlekettik organdar men el basshylyǵyn habardar etý qajet. Turǵyndarmen keri baılanys ornatyp, olardyń ótinishterine dereý qulaq asý kerek.
- Sý resýrstary mınıstrligi men ákimdikter, ásirese elimizdiń soltústik jáne shyǵys óńirlerinde ornalasqan sý qoımalary men nysandardaǵy sýdyń deńgeıin erekshe baqylaýda ustaý qajet. Gıdrotehnıkalyq qurylystardyń qaýipsizdigin qamtamasyz etý kerek.
- Tótenshe jaǵdaılar, İshki ister mınıstrlikteri men óńir ákimdikterine ahýal kúrdelene túsken jaǵdaıda ony baqylaýda ustaýdy tapsyramyn. Qajet bolsa, qosymsha kúshter men quraldardy jumyldyrý kerek.
- Kólik mınıstrligi óńir ákimdikterimen birge zaqymdanǵan jol ınfraqurylymyn qalpyna keltirý boıynsha sharalar qabyldasyn. Joldar men kópirlerdiń jaǵdaıyna turaqty túrde monıtorıń júrgizý qajet.
- Ekologıa mınıstrligi aýa raıy boljamynyń nasharlaýyna qatysty aqparat alǵan kezde dabyldy eskertýler týraly tıisti memlekettik organdardy jedel habardar etsin.
- Sıfrlyq damý mınıstrligi sý tasqynyn boljaý jáne modeldeý jumystaryn jalǵastyrsyn. Tasqyn aqparattyq júıesin onyń jumysyna qatysty aıtylǵan syn men anyqtalǵan kemshilikterdi nazarǵa ala otyryp jetildirsin.
- Byltyrǵy sý tasqynyn eskere otyryp, TJ zardaptaryn joıý jáne turǵyndarǵa kómek kórsetý máseleleri boıynsha barlyq normatıvtik quqyqtyq aktilerdi ózektendirý jumysyn bir apta merzimde aıaqtaý qajet.