Bıyl qazaqtyń kórnekti kompozıtory, dırıjer Nurǵısa Tilendıevtiń týǵanyna 100 jyl tolady.
2023 jyly Ázerbaıjanda ótken TÚRKSOI-ǵa múshe memleketterdiń mádenıet mınıstrleri Turaqty keńesiniń 40-shy otyrysynyń qorytyndysy boıynsha, 2025 jyl uly kompozıtordyń 100 jyldyq mereıtoıyna oraı TÚRKSOI uıymy aıasynda Nurǵısa Tilendıevti eske alý jyly bolyp jarıalandy, dep habarlaıdy aqshamnews.kz.
Qazaqstanda jáne shet elderde kompozıtordyń ómiri men shyǵarmashylyǵyna arnalǵan estelik is-sharalar ótýde.
Nurǵısa Tilendıevtiń 100 jyldyǵy Túrkıada da atap ótildi. Ankarada TÚRKSOI uıymy aıasynda eske alý jylynyń ashylý saltanaty ótti. Túrki áleminiń kórnekti qaıratkerine arnalǵan is-shara barysynda Nurǵısa Tilendıevtiń shyǵarmalary oryndalyp, onyń ómiri men shyǵarmashylyǵy týraly kórme qoıylyp, qysqametrajdy fılm usynyldy.
QR Ulttyq kitaphanasynda da Nurǵısa Tilendıevti eske alý keshi ótti.
İs-sharaǵa kompozıtordyń qyzy, N.Tilendıev atyndaǵy «Otyrar sazy» Memlekettik akademıalyq fólklorlyq-etnografıalyq orkestriniń kórkemdik jetekshisi jáne bas dırıjeri Dınara Tilendıeva, sondaı-aq konservatorıa, mýzykalyq kolej stýdentteri men mektep oqýshylary, kitaphana oqyrmandary men kesh qonaqtary qatysty.
Kezdesýde «Otyrar sazy» orkestri Nurǵısa Tilendıevtiń shyǵarmalaryn oryndady. Sondaı-aq, «Dáýir úni – Nur-aǵa» kitap kórmesi uıymdastyrylyp, kitaphananyń úlken zalynda kompozıtordyń memorıaldyq mýzeıiniń ekspozısıasy usynyldy. Kórmege Nurǵısa Tilendıevtiń fotosýretteri, marapattary, «Bolmasyn soǵys, bolmasyn!» týyndysynyń notasy, jeke dombyrasy jáne basqa da qundy dúnıeleri qoıyldy.
Qazaqtyń kórnekti kompozıtorynyń 100 jyldyǵyna arnalǵan is-sharalar jyl boıy atap ótiledi.