Qylmystyq ister kórsetkishi 7,6 paıyzǵa tómendegen
QR İshki ister mınıstrligi sońǵy aptada el aýmaǵynda tirkelgen qylmystar týraly baıandady, dep habarlaıdy Almaty-akshamy.kz QazAqparatqa silteme jasap.
«Bir apta ishinde 3266 qylmys jasaldy, onyń 2033-i táýlik ishinde ashyldy. Polısıa qyzmetkerleri 6 kisi óltirýdi, 7 ólimge ákep soqqan densaýlyqqa qasaqana aýyr zıan keltirýdi, 2 qaraqshylyq, 38 tonaý jáne 463 bóten múlikti urlaý qylmysyn «izin sýytpaı» ashqan», - dedi QR İİM baspasóz qyzmetiniń ókili Shuǵyla Turlybek mınıstrlik uıymdastyrǵan brıfıńte.
Sondaı-aq, ótken aptada Memleket basshysy Qasym-Jomart Toqaev İshki ister mınıstri Marat Ahmetjanovty qabyldady. Prezıdentke elimizdegi krımınogendik jaǵdaı týraly málimet berildi. Vedomstvo basshysynyń aıtýynsha, qylmystyq ister kórsetkishi 7,6 paıyzǵa tómendegen. Sonyń ishinde densaýlyqqa aýyr zaqym keltirý, qaraqshylyq, tonaý, mal urlyǵy, buzaqylyq, alaıaqtyq jáne zorlaý derekteri aıtarlyqtaı azaıǵan.
«Mınıstr qańtar oqıǵasy kezinde jasalǵan qylmystardy tergep-tekserý, kinálilerdi anyqtap, jaýapqa tartý, urlanǵan qarýlardy zańsyz aınalymnan alý jumystary jóninde esep berdi. Memleket basshysy qaýipsizdik máselelerin qoǵammen seriktestik ornatý arqyly sheshýge negizdelgen polısıanyń servıstik modelin engizý barysymen tanysty. Marat Ahmetjanov Prezıdentke İshki ister mınıstrliginiń qyzmetin búrokratıadan aryltý, sıfrlandyrý jáne jumys úderisin avtomattandyrý, ishki rásimderdi ońtaılandyrý jóninde baıandady», - dedi Sh.Turlybek.