Bul týraly memleket basshysynyń qabyldaýynda bolǵan Marat Ahmetjanov aıtty.
İshki ister mınıstriniń aıtýynsha, turmystyq zorlyq-zombylyq úshin jaýapkershilik kúsheıtiledi, dep habarlaıdy Almaty-akshamy.kz
Memleket basshysy Qasym-Jomart Toqaev ishki ister mınıstri Marat Ahmetjanovty qabyldady. Prezıdentke bıylǵy 10 aıdaǵy krımınogendik jaǵdaı týraly esep berildi.
Mınıstrdiń málimetinshe, kisi óltirý, zorlyq-zombylyq, tonaý, urlyq, mal urlyǵy, sondaı-aq buryn sottalǵandar tarapynan, mas kúıinde jáne otbasylyq-turmystyq salada jasalǵan qylmystar azaıǵan.
Memleket basshysyna quqyqbuzýshylyqtyń aldyn alý jumystary, atap aıtqanda, otbasylyq-turmystyq salada zorlyq-zombylyq jasaǵany úshin jaýapkershilikti kúsheıtý jónindegi keshendi sharalar ázirleý týraly málimet berildi.
Sonymen qatar uıymdasqan qylmystyń sebepteri men qarjylandyrý kózderin joıýǵa basa mán bere otyryp, olarǵa qarsy kúres tásilderiniń ózgergeni jóninde baıandaldy.
Mınıstrdiń aıtýynsha, bopsalaýmen, adam saýdasymen, qarý-jaraqty, esirtkini zańsyz satýmen jáne basqa da qylmystarmen aınalysqan 33 uıymdasqan qylmystyq toptyń joly kesildi.
Polıseıler zańsyz aınalymdaǵy 12 tonnaǵa jýyq esirtkini, sonyń ishinde onyń 212 kg sıntetıkalyq túrlerin tárkiledi. 36 esirtki zerthanasy men 43 esirtki kanaly joıyldy, esirtki jarnamalaıtyn 1900 saıt buǵattaldy. Mınıstrlik nashaqorlyqqa jáne esirtki bıznesine qarsy úsh jylǵa arnalǵan Keshendi jospar ázirlep jatyr.
Sonymen qatar prezıdentke «Adam saýdasyna qarsy is-qımyl týraly» jeke zań ázirlenip jatqany týraly baıandaldy.
Kezdesý sońynda Toqaev elimizde azamattardyń qaýipsizdigin jáne quqyqtyq tártipti qamtamasyz etýge baǵyttalǵan birqatar naqty tapsyrma berdi.