Óńirlik komýnıkasıalar qyzmetinde Almaty qalasy boıynsha Qazaqstan Respýblıkasy Saýda jáne ıntegrasıa mınıstrligi Tehnıkalyq retteý jáne metrologıa komıteti departamentiniń 2025 jylǵy jumysy qorytyndylandy, - dep habarlaıdy Aqshamnews.kz.
Departament basshysy Dáýren Sársenbaev tehnıkalyq retteý, baǵaly metaldar aınalymy men metrologıa salasyndaǵy memlekettik baqylaýdyń nátıjesi týraly baıandap, bul jumystyń tutynýshylardyń qaýipsizdigi men quqyqtaryna qalaı áser etetini jóninde baıandap berdi.
Jyl boıy departament tehnıkalyq reglamentter talaptarynyń saqtalýyna qatysty ártúrli salada memlekettik baqylaý men qadaǵalaý júrgizdi. Tekserý jumysy qurylys materıaldaryn, halyq tutynatyn taýarlardy, ónerkásiptik ónimderdi, avtokólik quraldaryn, munaı ónimderin, motor maılary men mobıldi qurylǵylardy ǵana emes, basqa da kóptegen baǵytty qamtydy. Departamenttiń jaýapkershilik aımaǵyna temirjol salasy, avtomobıl joldary, tómen kerneýli elektrotehnıkalyq jabdyqtar, pırotehnıkalyq buıymdar, aýyl sharýashylyǵy tehnıkasy, tyńaıtqyshtar, atraksıondar, balalar oıyn alańdary, lıftiler, mashınalar men jabdyqtar, jarylys qaýipti ortada qoldanylatyn jabdyqtar, ártúrli janarmaı túrleri, arnaýly suıyqtyqtar men maılar kiredi.
Tekserý barysynda ónimniń qaýipsizdigin rastaıtyn sáıkestikti baǵalaý qujattary – sertıfıkattar men deklarasıalardyń bolýyna nazar aýdarady. Sonymen qatar Qazaqstan Respýblıkasynyń «Ónimdi tańbalaýǵa qoıylatyn talaptar» tehnıkalyq reglamentine sáıkes taýar tańbalaýy men paıdalaný qujattamasynyń durystyǵy da tekseriledi. Tańbalaýda óndirýshi týraly málimetter, shyqqan eli, qyzmet etý nemese jaramdylyq merzimi kórsetilip, ol memlekettik jáne orys tilinde jazylýy tıis.
«Bizdiń mindetimiz – qujattardy jaı teksere salmaı, naryqta satylyp jatqan ónimniń adamdar úshin shynymen qaýipsiz ekenine kóz jetkizý. Satyp alýshy taýardy kim óndirgenin, qaıdan kelgenin, qaýipsiz be, joq pa, sony bilýi tıis. Bul ár tutynýshynyń quqyǵy», – dep atap ótti Dáýren Sársenbaev.
Departament jumysynyń jeke bir baǵyty baǵaly metaldar men asyl tastardan jasalǵan zergerlik buıymdardyń aınalymyn baqylaýǵa arnalǵan. 2025 jyly mundaı buıymdardy satýshylarǵa qatysty nysandarǵa barmaı-aq profılaktıkalyq baqylaý men qadaǵalaý júrgizilip, sonyń nátıjesinde kásipkerlerge anyqtalǵan zań buzýshylyqty joıý jóninde usynym-habarlamalar berildi. Sonymen qatar departament basshysy túsindirgendeı, eger tutynýshy synama tańbasy joq altyn buıym satyp alyp, shaǵym túsirse, departament jospardan tys tekserý bastaıdy. Synama tańbasy joq buıymdy satqany rastalǵan jaǵdaıda, quqyq buzýshy ákimshilik jaýapqa tartylady.
«Synama tańbasy joq zergerlik buıymdardy satý – aýyr quqyq buzýshylyq. Teksergende bıznes sanatyna baılanysty 50-den 150 aılyq eseptik kórsetkishke deıin aıyppul salynady. Satýshy zańsyzdyqty joıyp, buıymǵa saraptama júrgizýge mindetti», – dep túsindirdi Dáýren Sársenbaev.
Saraptama júrgizilgennen keıin buıym resmı túrde synamany rastaıtyn barys basy beınesindegi synama tańbasyn alýy tıis, sodan keıin ǵana qaıtadan satylymǵa jiberiledi. Suraqtyń kóbi bóligi metrologıa men ólsheý dáldigin baqylaýǵa baılanysty boldy. Departamentte barlyq ólsheý quraldary, sonyń ishinde elektr energıasy, sý jáne gaz eseptegishteri aınalymǵa shyǵar kezde, qoldanar aldynda Ólsheý quraldarynyń memlekettik tizilimine engizilýi tıis ekeni eske salyndy.
Bul tizilimdi «Qazaqstan standarttaý jáne metrologıa ınstıtýty» RMK júrgizedi. Tekserý merzimdiligi quraldyń túrine baılanysty. Sýyq jáne ystyq sý eseptegishin sońǵy teksergen kúnnen bastap 5 jyldy bir tekseredi. Elektr energıasyn esepke alatyn barlyq quraldardiki - 8 jyl. Turmystyq gaz eseptegishiniń de tekserýaralyq ıntervaly 5 jyl bolyp belgilengen.
«Eseptegishterdiń dáldigi tólem túbirtekterindegi somalarǵa tikeleı áser etedi. Eger esepke alý quraly ýaqytynda tekserýden ótpese, tutynýshy ózi baıqamaı artyq tóleýi múmkin. Sondyqtan biz tekserý merzimin qadaǵalap, osy talaptyń saqtalýyn talap etemiz», – dep atap ótti departament basshysy.
Jýrnalıserdiń qyzyǵýshylyǵyn týdyrǵan taǵy bir taqyryp – saýda ortalyqtary men bazarlarda qoldanylatyn tarazylardy tekserý máselesi boldy. Departament ókilderi mundaı tarazylar Qazaqstan Respýblıkasynyń ólshem birligin qamtamasyz etýdiń memlekettik júıesine engizilip, mindetti túrde tekserýden ótýi tıis ekenin aıtty. Saýdada qoldanatyn tarazynyń qoldanystaǵy tekserý tańbasy men tekserý sertıfıkaty bolýy qajet. Bul satyp alýshynyń tólegen mólsherdegi taýardy alýyna kepildik beredi.
Qorytyndylaı kele, departament ókilderi tehnıkalyq retteý men metrologıa salasyndaǵy memlekettik baqylaý azamattardyń múddelerin qorǵaýǵa baǵyttalǵanyn atap ótti. Taýarlardyń qaýipsizdigi, ólsheýlerdiń dáldigi men belgilengen talaptardyń saqtalýy adamdardyń densaýlyǵyna, shyǵyndaryna jáne naryqqa degen senimine tikeleı áser etedi.