Sondaı-aq bıyl «Informatıka» páni UBT beıindik pánder kombınasıasynyń tizimine engen.
Qazaqstan boıynsha 218 talapker hımıa-fızıka kombınasıasyn tańdaǵan. Bul týraly búgin Ortalyq komýnıkasıalar qyzmetinde ótken brıfıńte Ulttyq testileý ortalyǵynyń dırektory Rýslan Emelbaev málim etti, dep habarlaıdy Almaty-akshamy.kz Azattyq Ruhy-na silteme jasap.
Sonymen qatar Ǵylym jáne joǵary bilim vıse-mınıstri Qýanysh Erǵalıev habarlaǵandaı, bıyl «ınformatıka» páni UBT-daǵy beıindik pánder qataryna kirgen.
«Osyǵan baılanysty «Informatıka muǵalimderin daıarlaý», «Aqparattyq tehnologıalar», «Aqparattyq qaýipsizdik» bilim berý baǵdarlamalarynyń toptaryna túsýshiler «matematıka-ınformatıka» kombınasıasy boıynsha UBT tapsyrady», - dedi vıse-mınıstr.
Óz kezeginde sóz alǵan Ulttyq testileý ortalyǵynyń dırektory bıyl talapkerlerdiń neshe paıyzy qandaı pánderdi tańdaǵanyn habarlady.
«Bıyl talapkerlerdiń 18%-y «Matematıka-Fızıka», 17%-y «Bıologıa-Hımıa», 13%-y «Shyǵarmashylyq», 10%-y «Matematıka-Informatıka» pánderin tańdady. Jyldaǵydaı, eń az tańdalatyn kombınasıa – «Hımıa-Fızıka», ony tek 218 bala tańdaǵan», - dedi QR ǴJBM Ulttyq testileý ortalyǵynyń dırektory Rýslan Emelbaev.