Almaty qalasyna jumys sapary barysynda Ulttyq ekonomıka mınıstri Álibek Qýantyrov «Mamyr-5» shaǵynaýdanynyń turǵyndarymen kezdesti.
Búgingi tańda Áýezov aýdanynda medısınalyq mekemelerdiń júktemesi ózekti bolyp tur. Kezdesý barysynda jergilikti turǵyndar mamandardyń tapshylyǵyna shaǵymdandy, dep habarlaıdy Almaty-akshamy.kz.
Mınıstr atap ótkendeı, azamattardy qajetti dárigerlermen jáne sapaly medısınalyq qyzmetpen qamtamasyz etý máselelerine erekshe kóńil bólinip jatyr.
2022 jyly «Mamyr-5» shaǵynaýdanynda jańa otbasylyq-dárigerlik ambýlatorıa salýǵa respýblıkalyq búdjetten 670 mln teńge bólingen edi. Munda ýchaskelik qyzmet bólimshesi, pedıatrlarǵa, gınekologtarǵa jáne tar beıindi mamandarǵa arnalǵan kabınetter ashylady. Tıisti jabdyqtarmen jabdyqtaý josparlanyp otyr. Ol bir táýlikte 200 kelýshige eseptelgen. Bul jumys istep turǵan aýdandyq emhananyń júktemesin azaıtýǵa múmkindik beredi. Qazir jumystardyń 95%-y aıaqtaldy.
Sonymen qatar, UEM basshysy Almaty qalasy boıynsha TMRK departamentine bardy. Jıyn barysynda departament jumysynyń negizgi baǵyttary talqylandy. Mınıstr tarıf belgileý máselelerin turaqty baqylaýda ustaýdy, «Tarıfti ınvestısıaǵa aıyrbastaý» baǵdarlamasy sheńberinde tabıǵı monopolıalar sýbektilerinen ótinimderdi jedeldetýdi jáne halyqpen keri baılanysty kúsheıtýdi tapsyrdy.
Sondaı-aq vedomstvo basshysy «Damý» kásipkerlikti damytý qorynyń bas keńsesinde boldy. Á.Qýantyrovqa qordyń atqarǵan jumystary týraly málimet berildi. Ótken jyly Almaty qalasy boıynsha «Bıznestiń jol kartasy» sheńberinde 87,4 mlrd teńge nesıe somasyna 1 703 joba sýbsıdıalandy.
Budan bólek, mınıstr️ Sadu Arena sport keshenine bardy. Nysan 6 myń sharshy metrden astam aýmaqta ornalasqan, ol ártúrli sport túrlerinen iri jarystar ótkizýge arnalǵan. Munda sportshylarǵa turaqty negizde qoldaý kórsetiledi. Sport nysanynyń ıesi qaıyrymdylyq týrnırlerin, oqý-jattyǵý jıyndaryn óteýsiz negizde únemi ótkizedi.