Erteń Astanada«Qazaqstan Barysy Grand Slam» týrnıri bastalady.
BAQ ókilderiniń qatysýymen ótken brıfıńide Qazaqstan dzúdo federasıasynyń bas hatshysy Asqat Jitkeev Eldos Smetovtiń «Qazaqstan Barysy Grand Slam» týrnırine nege qatyspaıtynyn aıtty, dep habarlaıdy Almaty-akshamy.kz.
«Ózderińiz biletindeı, Eldos Smetov Tashkent qalasynda kúresken ýaqytta jaraqat alǵan bolatyn. Keıin jyldyń aıaǵynda Masters týrnırinde kúreskende qaıta jaraqat aldy. Bıyldan bastap federasıanyń qoldaýymen Eldos Smetov em alyp jatyr. Buǵan deıin Parıjde, qazir elimizde emdelip jatyr. Ol jeke jospary boıynsha Almatyda daıyndalyp jatyr. Kópshilik «Eldos nege kúrespeıdi?» dep surap jatyr. Ol bul jarysqa qatyspaǵanymen, quramamen birge. Ol tamyz aıynda ótetin Masters týrnırine daıyndalyp jatyr», - dep toqtaldy Asqat Jitkeev.
Federasıasynyń bas hatshysy Eldos Smetov keler jyly Parıjde ótetin olımpıada oıyndaryna qatysyp, chempıon atanýy múmkin dep boljam jasady.
Halyqaralyq dodaǵa Ábıba Ábýjaqynova da qatyspaaıtyn boldy, Bul týraly Qazaqstan dzúdo federasıasy habarlady.
Resmı málimdemege sáıkes Ábıba komandanyń medısına mamandarynyń usynysy boıynsha atalǵan jarystan tys qalyp otyr.
«Tashkentte ótken álem chempıonatynda alǵan jaraqatynan (ıyǵy) tolyq aıyqqan joq. Jaraqatymen kúresse, ony asqyndyryp alý qaýpi bolǵandyqtan, Ábıbany álemdik jarysqa qatystyrmaý týraly sheshim qabyldandy», dep habarlady vedomstvodan.
Á.Ábýjaqynova Tashkenttegi álem chempıonatynda jartylaı fınalda jáne qola júlde úshin básekede qarsylastaryna jol berip, besinshi orynmen shektelgen bolatyn. Al ótken jyly álem birinshiliginde qazaq qyzdary arasynan tuńǵysh ret qola júldeger atanǵan edi.