Syrqattyp jatqan adamdardyń basym bóligi - múldem vaksına almaǵandar.
Emhanada ekpe alýǵa kezekte turǵandar kóp emes. Biraq kún saıyn belgili bir sanattaǵy azamattar kelip, kovıdke qarsy vaksınalaýdan ótedi deıdi mamandar, dep habarlaıdy Almaty-akshamy.kz «Habar 24» caıtyna silteme jasap.
«Keıbir kisiler tek qana qazaqstandyq vaksınany salǵysy keledi. Olarǵa "Kaz-Vak" salamyz. Eger shetelge shyǵatyn bolsa, "Sınofarm" kompanıasy men "Faızerdi" salamyz», - deıdi qalalyq №9 emhananyń jalpy tájirıbelik dárigeri Nurálem Sarapbekov.
Orta jáne 50 jastan asqan adamdar ekpe alýǵa jıi keledi deıdi dáriger. Sondaı-aq sozylmaly aýrýlary bar jáne shetelge baratyn adamdar vaksına alýǵa asyǵady. Jalpy, koronavırýs qarqyny jazda baıaýlady. Biraq qazir aýyrǵandardyń sany taǵy kóbeıgen.
«Qazirgi tańda Astana qalasynda epıdemıologıalyq jaǵdaı sońǵy eki aptada turaqsyz dep aıtýǵa bolady. Bizdiń qalada sońǵy aptada 458 jaǵdaı tirkeldi», - deıdi qalalyq Sanepıdbaqylaý departamenti basshysynyń orynbasary Janna Pirálıeva.
Qarasha aıynyń alǵashqy aptasymen salystyrǵanda, vırýs juqtyrǵandar bes ese kóp. Bul jańa shtamnyń yqpaly ma álde qazirgi jaǵdaı buryn salynǵan vaksınanyń áseri azaıǵandyǵyn bildire me?
«Qazirgi kezde syrqattanyp jatqan adamdardyń basym bóligi - 80 paıyzdan astamy - múldem vaksına almaǵandar. Ne bolmasa, sońǵy ekpeni alǵannan keıin 6 aıdan astam ýaqyt ótken adamdar naýqastanyp jatyr», - deıdi Vaksınamen basqarylatyn ınfeksıalardy baqylaý basqarmasynyń basshysy Nurshaı Ázimbaeva.
Sondaı-aq molekýlárlyq-genetıkalyq zertteýler Astanada aýyrǵandardyń kóbinen "serber" shtamyn anyqtaǵan. Al 79 paıyzynda "omırkon" shtamy ekeni belgili boldy.
"Serberdiń" ózi de "omıkronnyń" bir túri bolyp tabylady. Endi "serberge" kelsek, ol adamǵa óte tez juǵady. Biraq ol asa aýyr túrde ótpeıdi. ol da basqa respıratorly vırýs sıaqty, qyzý kóteriledi, denesi aýyrady, bas aýyrady. Sol sıaqty bastalady. Sol úshin biz vaksına almaǵan adamdardy tezirek ekpe alýǵa shaqyramyz», - deıdi qalalyq Sanepıdbaqylaý departamenti basshysynyń orynbasary Janna Pirálıeva.
Mamandar vaksına alǵan adamdardyń koronavırýspen jeńil túrde aýyratynyn atap ótti. Sondaı-aq revaksınalaýdan ýaqytynda ótýdi eske saldy. Óıtkeni kovıd shtamdary ózgerip otyrady. Al onymen aýyryp turǵannyń ózinde, aǵzadaǵy antıdeneler jarty jylda azaıyp ketedi. Qazaqstan boıynsha kovıdke qarsy ekpe salatyn 2 myń pýnkt jumys istep tur.