İs-shara UNECA-daǵy jyl saıynǵy Dıplomatıalyq bazar aıasynda ótti.
Qazaqstannyń Táýelsizdik kúni qarsańynda BUU-nyń Afrıka elderine arnalǵan Ekonomıkalyq jáne áleýmettik komısıasynyń (UNECA) alańynda alǵash ret qazaqtyń kıiz úıiniń tusaýkeseri boldy, dep habarlaıdy Almaty-akshamy.kz Elorda.info saıtyna silteme jasap.
İs-shara UNECA-daǵy jyl saıynǵy Dıplomatıalyq bazar aıasynda ótti. Tusaýkeserge Addıs-Abebadaǵy BUU organdarynyń, Afrıka odaǵy komısıasynyń, Efıopıanyń memlekettik organdarynyń qyzmetkerleri, Addıs-Abebada akkredıttelgen shet memleketterdiń elshileri, sondaı-aq Afrıkadaǵy Qazaqstannyń Dostar klýbynyń músheleri qatysty.
Tusaýkeserde qazaq halyq bılerinen «Qamajaı» jáne «Qara jorǵa», Abaıdyń poezıalyq shyǵarmalarynan turatyn mádenı baǵdarlama kórsetildi.
Ulttyq oıý-órnektermen, qazaq mýzykalyq aspaptarymen, turmystyq zattarmen jáne ulttyq kostúmdermen bezendirilgen qazaq kıiz úıi is-sharaǵa qatysýshylardyń erekshe qyzyǵýshylyǵyn týdyrdy. Qonaqtarǵa qazy, baýyrsaq, jent jáne basqa da qazaq ulttyq taǵamdary usynyldy.
Afrıka elderin mádenıetimizben jáne IýNESKO-nyń materıaldyq mádenı mura tizimine engen kıiz úımen tanystyrý bıyl aıaqtalatyn Qazaqstan bastamasymen belgilengen BUU mádenıetter jaqyndasýynyń halyqaralyq on jyldyǵy, sondaı-aq mádenıetaralyq dıalog pen yntymaqtastyqty damytý kontekstinde mańyzdy mánge ıe boldy.
Tusaýkeser is-shara qonaqtarynyń kóńilinen shyǵyp, Qazaqstan mádenıetine úlken qyzyǵýshylyq týdyrdy.