Elimizdegi 10 qalada aýanyń joǵary lastanýy saqtalyp otyr.
Bul týraly Ekologıa jáne tabıǵı resýrstar mınıstri Zúlfıa Súleımenova aıtty, dep habarlaıdy Almaty-akshamy.kz QazAqparatqa silteme jasap.
«Atmosferalyq aýanyń ındýstrıa tarapynan lastanýy ekologıalyq retteý aıasynda lastaýshy zattardyń shyǵaryndylary men tógindilerin retteý negizinde júzege asyrylady. Osy baǵytta byltyr naqty shyǵaryndylardyń kólemi 2021 jylǵa qaraǵanda 4,1 paıyzǵa, al tógindiler kólemi 11,7 paıyzǵa qysqardy. Sonymen qatar júıeli túrde aýany lastaǵany, ekologıalyq zańnamany buzǵany úshin Atyraý munaı óńdeý zaýytynyń ekologıalyq ruqsatyn toqtata turý boıynsha is sotqa joldanǵan bolatyn. Qabyldanǵan sharalarǵa qaramastan elimizdiń 10 qalasynda aýanyń joǵary lastanýy saqtalýda. Osy qalalarǵa Astana, Almaty, Qaraǵandy, Temirtaý, Atyraý, Aqtóbe, Balqash, Óskemen, Jezqazǵan, Rıdder kiredi», - dedi ol mınıstrliktiń keńeıtilgen alqa májilisinde.
Jalpy, onyń atap ótýinshe, elimizdegi ekologıalyq ahýaldy jaqsartý jumystary qabyldanǵan jańa Ekologıalyq kodeks, bekitilgen «Jasyl Qazaqstan» ulttyq jobasy, óńirlerdegi ekologıalyq jaǵdaıdy jaqsartý boıynsha Jol kartalary aıasynda iske asyrylyp jatyr.
«Aıta ketetin jaıt, qabyldanǵan jol kartalary qoǵamdy keńinen tartý negizinde qalyptastyrylǵan jáne 485 is-sharany qamtıdy. Jańa oblystarda jol kartalary ázirlený ústinde. Byltyr birqatar jol kartasyn ózektendirý jumysy júrgizildi», - dedi Zúlfıa Súleımenova.