Qyzylorda oblysynda búgin eki aýyldyq okrýgte ákim saılaýy ótip jatyr, dep habarlaıdy Almaty-akshamy.kz.
Qazaqparat taratqan málimetke sáıkes, saıası mańyzdy shara QR Saılaý týraly konstıtýsıalyq Zańyna sáıkes júrgizilýde. Qyzylorda oblysynyń Aral aýdanynda Jańaqurylys jáne Qulandy aýyldyq okrýgteriniń turǵyndary tańǵy saǵat 7.00-den bastap №22 jáne №29 ýchaskelerinde tańdaý jasaýǵa keldi. Olardyń arasynda alǵashqy kelgen saılaýshylarǵa syılyqtar berildi.
Jańaqurylys aýyldyq okrýginiń ákimine 4 azamat úmitker retinde tirkelgen. Olardyń barlyǵy - ózin-ózi usyný tártibimen úmitkerler. Okrýgte barlyǵy 408 saılaýshy tirkelgen.
Al, Qulandy aýyldyq okrýgindegi 267 saılaýshy ákim saılaýynda 3 úmitkerdiń arasynan laıyqtysyn tańdaýǵa nıet bildirip otyr. Olardyń bári ózin-ózi usyný jolymen kandıdat retinde tirklegen.
«Jyl basynan beri Qyzylorda oblysynda 8 aýyl ákimi saılandy. Atap aıtqanda, Qazaly aýdanynyń Aqjona, Aryqbalyq, Jalaǵash aýdanynyń Jańadarıa, Aqqum, Myrzabaı ahýn, Syrdarıa aýdanynyń Aqjarma, Jańaqorǵan aýdanynyń Jańaryq jáne Qarmaqshy aýdanynyń Aqtóbe aýyldyq okrýgi bar. Endi 25 maýsymda Jańaqorǵan aýdanynyń Súttiqudyq pen Qaratóbe aýylynyń ákimderi saılanady. Bıyl Prezıdent tapsyrmasyna sáıkes aýdan ákimderiniń saılaýy ótedi. Qyzylorda oblysynda turǵyndar 2 aýdan ákimin tikeleı saılaı alady», - dep málim etti oblystyq saılaý komısıasynan.