Qundy jádigerler

Qazaqstan Respýblıkasy Prezıdentiniń Arhıvinde memlekettik rámizderdiń daıyndalý tarıhyna qatysty biregeı arhıvtik qujattar saqtalǵan. 90 jyldardyń basynda-aq eldiktiń tiregi memlekettik rámizder týraly jobalarmen jantalasyp aınalysqan ıdeıalogıalyq belsendi top pen belgili ǵalymdarymyzdyń áreketteri búgingi býyn úshin erlikke para-par. Akademık Manash Qozybaevtyń 1990 jyly 18 maýsymda jazǵan eldiń Gımni men Eltańbasyn aýystyrý kerektigi týraly haty Prezıdent Arhıviniń qundy jádigeriniń biri dep esepteımiz. Bul hatta ol jeke basqa tabyný kezinde jazylǵan, keńestik ıdeıalogıany kóksegen rámizderden bas tartyp, jas memlekettiń jańa Gımnin jarıalaý eń mańyzdy másele dep bastama kóteredi.
1992 jyly memlekettik rámizderdiń jobasyn tańdaý úshin baıqaý jarıalanady. Memlekettik Týdyń 453 nusqasy, Eltańbanyń 245, Gımnniń 51 mýzykalyq jáne 132 mátindik nusqasy usynylǵan. Onda búgingi Eltańbamyzdyń avtory J. Málibekov, Týdyń avtory Sh. Nıazbekov, alǵashqy Gımnniń mýzykasynyń avtorlary M. Tólebaev, E. Brýsılovskıı jáne L.Hamıdı jáne úzdik mátinge jarıalanǵan baıqaýda avtorlar ujymy, belgili aqyndar M. Álimbaev, Q. Myrzalıev, T. Moldaǵalıev jáne J. Dáribaeva jeńip shyqty. 1992 jylǵy 4 maýsymda «Memlekettik Tý týraly», «Memlekettik Eltańba týraly» jáne «QR Memlekettik Gımniniń mýzykalyq redaksıasy týraly» Qazaqstan Respýblıkasynyń Zańdary bekitildi. Bul nusqalardyń barlyǵy QR Prezıdenti Arhıviniń qorynda memlekettik saqtaýdy ornalasqan.
Táýelsiz Qazaqstannyń tarıhynda elimizdiń memlekettik Gımni eki ret – 1992 jáne 2006 jyldary bekitildi. 2006 jyly qalyń buqaranyń talqylaýy nátıjesinde Sh. Qaldaıaqov pen J. Nájimedenovtiń 1956 jyly jazǵan «Meniń Qazaqstanym» ániniń nusqasy Ánuran retinde usynyldy, mátinge QR Prezıdenti N.Á. Nazarbaev ózgertýler engizdi.
1996 jylǵy 24 qańtarda «Qazaqstan Respýblıkasynyń memlekettik rámizderi týraly» Konstıtýsıalyq zańmen úsh rámizdiń barlyǵy bir zań aktisine biriktirilgen bolatyn. Keıinnen 2007 jyldyń 4 maýsymynda Qazaqstan Respýblıkasynyń memlekettik rámizderi týraly №258-İİİ Konstıtýsıalyq zań qabyldanyp, aldyńǵy zańdar kúshin joıǵan bolatyn.
Munda memlekettik rámizderdiń túr, sıpattary men mártebeleri naqtylap jazylyp, zańmen qorǵalatyny, sondaı-aq olardy qoldaný tártibi zańnyń qosymshalary arqyly baıandalǵan.
Arhıv qorynda osy qundy qujattardyń qatarynda memlekettik rámizderdi qabyldaýǵa qatysqan barlyq belsendi azamattardyń usynystary, kásibı sýretshilerdiń eskızderi, zańnamalyq aktiler, arnaıy komısıanyń sheshimderi men saraptamalyq qorytyndylary, qoǵam jáne memleket qaıratkerleriniń hattary da saqtaýly tur.