Ulttyq bank tóraǵasynyń orynbasary Berik Sholpanqulovtyń aıtýynsha, bankter mobıldi tólemderdiń bankaralyq júıesine qosylady, dep habarlaıdy aqshamnews.kz
UB ókiliniń aıtýynsha, bankterge mobıldi tólemderdiń bankaralyq júıesine qosylý mindeti kózdelip otyr. Sózinshe, bul klıentterge bankaralyq QR tólemder men mobıldi aýdarym servısterine qoljetimdilikti qamtamasyz etýge múmkindik beredi.
Biz bankterdiń ózara tıimdi jumys isteýin, qarjy qyzmetteriniń qoljetimdi bolýyn jáne básekelestikti damytyp, tutynýshy quqyǵynyń qorǵalýyn qamtamasyz etýdi kózdeımiz. Sonymen birge elimizdiń qarjy sektorynyń derbestigin nyǵaıtýdy josparlap otyrmyz, – deıdi ol.
Bankterdiń qazirgideı óz QR-kody arqyly qyzmeti ózinde qalady. Sonymen qatar, qaı bank bolǵanyna qaramastan azamattar dúkenderde biryńǵaı QR-kod arqyly aqsha tóleı alady.
Ulttyq Bank ulttyq sıfrlyq qarjy ınfraqurylymynyń negizgi komponentterin iske qosqan. Olar:
Ulttyq tólem júıesi,
Alaıaqtyq tranzaksıalarǵa qarsy ulttyq ortalyq,
Qashyqtan bıometrıalyq sáıkestendirý júıesi,
Ashyq bankıng jáne Sıfrlyq teńge platformalary.
Qazir qatysýshylar sanyn kóbeıtip, servısterdi ulǵaıtý baǵytynda jumystar jalǵasyp jatyr. Sonymen qatar, ulttyq sıfrlyq qarjy ınfraqurylymynyń mártebesin, maqsaty men mindetin bekitetin zańnamalyq túzetýler ázirlengen.