Almaty qalasy, Naýryzbaı aýdanynyń Inovasıalyq shyǵarmashylyq ortalyǵynda «AMANAT» partıasynyń «Quqyqtyq kómek» jobasy aıasynda turǵyndardyń ózekti máselelerin tıimdi sheshýge baǵyttalǵan mańyzdy is-shara – mobıldi qoǵamdyq qabyldaý ótti.
İs-sharanyń negizgi maqsaty – turǵyndardyń ómirinde týyndaǵan túıtkildi máselelerdi tikeleı tyńdap, olarǵa jedel jáne bilikti keńes berý arqyly naqty kómek kórsetý. Qabyldaýǵa Almaty qalalyq máslıhatynyń depýtaty Bolat Ibragımuly, «AMANAT» partıasynyń Naýryzbaı aýdandyq fılıalynyń tóraǵasy Baımurat Jambylov, sondaı-aq memlekettik mekemelerdiń ókilderi men tájirıbeli zańgerler qatysty.
Qoǵamdyq qabyldaý kezinde aýdan turǵyndary túrli suraqtarmen júgindi. Kóterilgen máselelerdiń basym bóligi áleýmettik-ekonomıkalyq sıpatta boldy. Atap aıtqanda, azamattar nesıelik mindettemelerin óteý tártibi, medısınalyq mekemelerge tirkelý, banktik esepshottardyń buǵattalýy, sondaı-aq turǵyn úımen qamtamasyz etý jáne basqa da áleýmettik mańyzy bar máseleler boıynsha kómek surady.
Kelýshilerdiń árbir ótinishi jeke qaralyp, zań aıasynda naqty jaýaptar men keńester berildi. Qajet bolǵan jaǵdaıda, keıbir máseleler boıynsha jaýapty organdarǵa resmı saýaldar joldanatyny aıtyldy. Zańgerler men sala mamandary turǵyndarǵa quqyqtyq turǵydan baǵyt-baǵdar usynyp, týyndaǵan jaǵdaıdan shyǵý joldaryn túsindirdi.
Depýtat Bolat Ibragımulynyń aıtýynsha, mundaı qoǵamdyq qabyldaýlar halyqpen ashyq dıalog ornatýǵa, olardyń muń-muqtajyn jedel jetkizip, sheshim qabyldaý úderisin jeńildetýge zor múmkindik beredi:
«Biz úshin eń mańyzdysy – turǵyndardyń senimi. Olar óz máselesimen kimge júginerin bilip, naqty kómek alýy qajet. Partıanyń qolǵa alǵan bul jobasy osy baǵytta úlken nátıjelerge jetip keledi», – dedi depýtat.
Uıymdastyrýshylardyń pikirinshe, mobıldi qoǵamdyq qabyldaýlar «AMANAT» partıasynyń halyqpen tikeleı baılanys ornatýdaǵy tıimdi quralyna aınaldy. Joba aıasynda elimizdiń túkpir-túkpirinde osyndaı qabyldaýlar jalǵasyn tabýda. Bul bastama partıanyń halyqpen ashyq ári esep beretin saıası uıym ekenin dáleldeıdi.