Birikken Arab Ámirlikterinde ótip jatqan qazaqstandyq kásiporyndardyń saýda-ekonomıkalyq mısıasy aıasynda 28 mıllıon AQSH dollaryna kelisim jasaldy, dep habarlaıdy almaty-akshamy.kz 24KZ-ke silteme jasap.
Otandyq bıznes-delegasıany Saýda jáne ıntegrasıa mınıstri Arman Shaqqalıev bastap bardy. İs-sharaǵa 60-tan astam otandyq kompanıa ókilderi qatysty.
Bıbigúl Nysanbaeva, tilshi:
- EXPO Dubai kórme ortalyǵynyń aýmaǵynda ornalasqan ulttyq pavılonda búgin Made in KZ ónimderiniń tusaýkeseri ótetin Qazaqstan saýda úıi ashylyp, Qaz Steppe Innovation Hub jumysyn bastady. İs-sharaǵa eki eldiń 200-den astam kompanıasy, sondaı-aq memlekettik organ, bıznes uıym ókilderi jınaldy.
Ótken jyly Qazaqstan men Ámirlikter arasyndaǵy taýar aınalymy 329 mln AQSH dollaryn qurady. Qazaqstandyq eksport 210 mıllıonnan astam, Ámirlikter bizdiń elge shamamen 119 mıllıon dollardyń taýaryn jóneltken. Saýda-ekonomıkalyq áleýet joǵary, elder saýda kólemin 1 mıllıardqa jetkizýdi josparlap otyr. 2 kúndik kelissózder nátıjesinde taraptar 28 mıllıon 650 myń dollardyń kelisimine qol qoıdy.
Arman Shaqqalıev, QR Saýda jáne ıntegrasıa mınıstri:
- Aýyl sharýashylyǵy óndirýshileri, azyq-túlik jaǵynan bal óndirýshiler, et óndirýshiler sıaqty óndirýshilerdiń arasynda qol qoıylǵan sharalar. Bizdiń óndirýshiler aqsha alyp, Ofteık-kelisimsharttarǵa, turaqty sharttarǵa qol qoıyp, sondaı 5-6 jylǵa sharttardy engizdik biz.
Parsy shyǵanaǵy naryǵyna saýda aǵynyn ulǵaıtý úshin Úkimet mańyzdy sharalar oryndap otyr. Bul baǵyt qazaqstandyq eksporttaýshylarǵa aýyl sharýashylyǵy taýarlaryn Quryq portynan Parsy shyǵanaǵy men Afrıka elderine jyldam jetkizýge múmkindik beredi.
Anvar Nıetqalıev, «Qazaq Agro Eksport» kompanıasynyń dırektory:
- Pavlodar oblysy, Soltústik Qazaqstan, Aqmola oblysy, Ulytaý oblysy. Qoı etin osynda eksport jasaımyz. Kólemi 10 mıllıon dollar bir jylǵa. Eń birinshiden, bizde qoı eti, sosyn qus bolady, sosyn ýyldyryq, qudaı qalasa, jáne taǵy basqa ónimderdi eksporttaımyz.
Hamad Aldjýmah, kásipker:
- Qazaqtyń etine Ámirlikterge ǵana emes, Saýd Arabıasynda, Katar memleketterinde suranys joǵary. Sondyqtan búgin, mine, úlken kólemde shart jasastyq. Qazaqstan pavılony budan bylaı ozyq qazaqstandyq startap jobalardyń da basyn biriktirmek. Inovasıalyq hab otandyq IT jobalardy Ámirlikter naryǵyna shyǵarý, súıemeldeýmen aınalyspaq. Tek ótken jyldyń ózinde bul elge qazaqstandyq IT ónimderi men qyzmetteriniń eksporty 5 ese ósip, 500 mıllıon dollarǵa jetken.
Arýjan Mede, IT kompanıa basshysy:
- Biz BAÁ-ge endi shyǵyp jatyrmyz. Oflaın túrde istep jatqan kompanıalaryn sıfrlandyrýǵa, onlaın túrinde jumys isteýge kómektesemiz.
Pavılon ınfraqurylymy kásipkerlerge jyldyń sońyna deıin tegin beriledi. Saýda úıiniń ashylýyna kelgender qazaqstandyq taýarlardyń kórmesin tamashalady.
Baqytjan Jumadil, kásipker:
- Mynaý – bizdiń ata-babalarymyzdyń tamaqtary. Kóship júrgende jolda jeıtin. Alty aı daıyndalady. Arabtar qyzyǵyp jatyr. Arabtarǵa altynmen qaptaımyz.
Dýbaıda ótken Qazaqstannyń saýda-ekonomıkalyq mısıasyna elimizden 60-tan astam kompanıa ókilderi arnaıy keldi. B2B kezdesýleri uıymdastyrylyp, qazaqstandyq jáne ámirlik kásiporyndary arasynda tikeleı baılanys ornady.