Almatyda 30-31 tamyzda jyl saıynǵy eń aýqymdy avtoshoý - MotorFest Almaty 2025 ótti. 10 myńnan astam kóliksúıer, 200-den astam erekshe avtokólik, halyqaralyq deńgeıdegi qatysýshylar jınalǵan shara nesimen este qaldy? Janarlardy jaýlaǵan jyl oqıǵasynda qandaı avtomobılder úzdik atandy? Aqshamnews.kz tilshisiniń materıalynda.
sýret: drive2.ru saıtynan alyndy
Shaǵyn sharadan halyqaralyq festıválge deıin
Motorfest alǵash ret 2017 jyly QBTÝ mańyndaǵy shaǵyn alańqaıda ótti. Ol kezde bar-joǵy qyryq shaqty kólik qatysqan edi. Alaıda avtosúıer qaýymnyń yqylasy zor bolǵandyqtan, 2018 jyldan bastap festıvál dástúrli túrde Medeý muz aıdynynda uıymdastyrylyp keledi. Sol jyly alǵash ret kórshi elderden - Ózbekstan men Qyrǵyzstannan qatysýshylar kelip, festıvál halyqaralyq mártebege ıe boldy. Sáıkesinshe festıvál bıyl segizinshi ret ótip otyr.
sýret: drive2.ru saıtynan alyndy
Jobanyń negizin qalaýshylar - avtoblogerler Azat (cars_kz) pen Darhan (low_kz). Olardyń bastamasy búginde Orta Azıadaǵy avtomádenıettiń damýyna úlken úles qosyp otyr.
Motorfest bıyl Medeýde sońǵy ret
2025 jylǵy festıvál erekshe este qaldy. Sebebi aldaǵy jyldary Medeýde rekonstrýksıa jumystary júretindikten, Motorfest biraz ýaqytqa bul alańnan ketýge májbúr. Sondyqtan bıylǵy shara sońǵy "Medeý maýsymy" retinde ótti.
sýret: drive2.ru saıtynan alyndy
MotorFest - kólikti jaqsy kóretinderdiń jumaǵy. Munda árbir qatysýshy óziniń erekshe jobasyn kórsetip, qıalyn shyndyqqa aınaldyrady.
Áskerı stıldegi "bombardır Volga GAZ-21"
Almatylyq entýzıast Maqsat Mamraımov (@maks_braat) óz jobasyn naǵyz óner týyndysyna aınaldyrdy. Ol osydan 12 jyl buryn Sarqandtan 130 myń shaqyrym júrgen GAZ-21 kóligin satyp alyp, bastapqyda restavrasıalaýdy oılaǵan. Biraq qıalǵa erik berip, kólikti áskerı "bombardır" stılinde qurastyrǵan. Artynda tipti "bomba ınstallásıasy" bar.
sýret: Nurbol Yntymaquly/aqshamnews.kz
Kólik negizi Toyota Aristo platformasynda jasalǵan. 11 jylda jobaǵa shamamen 30 mıllıon teńge ketken. Mamraımovtyń aıtýynsha, ıdeıaǵa degen senim ony sońyna deıin jetkizgen:
"Men ony alǵash alǵanymda 130 myń shaqyrym júrgen edi. Jobany 11 jyl jasadym. Búdjetti sanaǵan joqpyn, shamamen 30 mıllıon teńgedeı ketti. Biraq qıaldyń sońyna deıin barǵanda, nátıje barlyq eńbekti aqtady. Senseńiz bul kólikti áli úıdegi garajǵa da qoıyp úlgermedim",-deıdi ol.
sýret: Nurbol Yntymaquly/aqshamnews.kz
Aıta keteıik, GAZ-21 - KSRO-daǵy eń áıgili bıznes-klass kólikteriniń biri. Ony "Volga" dep ataý Reseıdiń basty ózenimen baılanysty qoıylǵan.
"AQSH prezıdentiniń kóligi"
Tarazdan kelgen Erken Kýrbanov (Instagram: @kurbanoverken) restavrasıaǵa erekshe mán beretin erekshe talǵamdy jan. Onyń 1960 jyldardaǵy Lincoln Continental jobasy kórmede naǵyz nazar aýdararlyq dúnıe boldy.
sýret: Nurbol Yntymaquly/aqshamnews.kz
Kólik alǵash AQSH-ta, keıin Máskeýde bolǵan. Sodan soń Qazaqstanǵa jetkizilgen.
"Kólikke qyzyǵýshylyq kishkentaı kezimnen bar. Bul hobbı ákemnen daryǵan desem de bolady. Bul kólikti AQSH-tan Máskeýge, odan keıin Qazaqstanǵa alyp kelgen. Úsh ret restavrasıa jasaldy. Metalǵa jetkende shirip ketkenin kórdik, biraq bárin sońyna deıin jóndep shyqtyq. Búdjetti eseptegen joqpyn. Bul – meniń ómirim, meniń kóńilimnen shyqqan dúnıe", - deıdi Erken myrza.
sýret: Nurbol Yntymaquly/aqshamnews.kz
Lincoln Continental - AQSH prezıdenti Djon Kennedıdiń qyzmettik kóligi bolǵan. Dál osy modeldiń kabrıolet nusqasynda 1963 jyly Dallas qalasynda qastandyq jasalyp, Kennedı qaza tapty. Búginde bul kóliktiń quny koleksıalyq naryqta 30 myńnan 100 myń dollarǵa deıin barady.
sýret: Nurbol Yntymaquly/aqshamnews.kz
Rolls-Royce-qa minip kórý baqyty kimderge buıyrdy?
Áleýmettik jelide @g_e_class atymen tanymal almatylyq Zaır Rzaev óziniń erekshe Rolls-Royce Cullinan 2022 kóligin festıválge ákeldi.
sýret: Nurbol Yntymaquly/aqshamnews.kz
Kóliktiń astyn jabyq kók, ústin aq túske boıap, salonǵa qyzǵylt sary túste erekshe stıl bergen. "Ekstaz rýhy" músini de dál sol túste. Ony Zaır erkeletip "karamel" dep ataıdy eken. Ol tipti kólik jaryq shamyna da juldyzdy aspan jasatqan.
sýret: Nurbol Yntymaquly/aqshamnews.kz
Odan bólek karbon árleýler, Qazaqstan kartasy beınelengen panel, tipti Skrýdj MakDak beınesi beınelengen bir qolynda dollar, bir qolynda teńge ustaǵan saǵat ta nazar aýdartady. Zaırdyń ereksheligi ol - kelýshilerge kólikke otyryp kórýge ruqsat berdi.
"Bul kólik halyq úshin jasalǵan. Árbir adam otyrsyn, sezinsin dedim. Erteń bireý esine alyp: “Men Motorfest-te Rolls-qa otyryp kórdim” dese, sonyń ózi jetkilikti", – deıdi ol.
sýret: Nurbol Yntymaquly/aqshamnews.kz
Rolls-Royce Cullinan - kompanıa tarıhyndaǵy alǵashqy krosover. Onyń ataýy álemdegi eń iri gaýhar tastyń qurmetine qoıylǵan.
BMW Z8 - jumbaq kólik
Festıválde erekshe nazarǵa ilikken kóliktiń biri - BMW Z8. Bul model tek 5700 danamen shektelip shyǵarylǵan asa sırek kólik. Ókinishke qaraı, kólik ıesimen tildesý múmkin bolmady.
sýret: Nurbol Yntymaquly/aqshamnews.kz
BMW Z8 - 1999 jyly "The World Is Not Enough" fılmine túsken. Onda Djeıms Bond osyndaı markaly kólikti júrgizgen. Búginde bul avto kolleksıonerler arasynda kúlt mártebesine ıe. Almatydaǵy úlgisi eski qazaqstandyq nómirmen kelgen, biraq onyń naqty tarıhy kópke beımálim.
Qyrǵyzstannan kelgen ańyz
Qyrǵyzstannan kelgen BMW E9 te kórmeniń sánin keltire tústi. Bul model 1968–1975 jyldary shyǵarylyp, BMW-nyń sporttaǵy qaıta órleýine sebepker bolǵan.
sýret: Nurbol Yntymaquly/aqshamnews.kz
BMW E9 - áıgili 3.0 CSL nusqasy arqyly avtosportta úlken jetistikterge jetti. Eger bul model shyqpaǵanda, sol kezeńde qarjylyq qıyndyqta bolǵan BMW-dy Mercedes satyp alýy múmkin edi degen pikirler de bar.
TOP-3 atanǵan úzdik jobalar qandaı?
Jyl saıynǵy dástúr boıynsha qazylar alqasy eń erekshe segiz kólikti tańdady. Olardyń arasynda úzdikke úshtikke ilingenderi:
1. Kýrbanov Erken (Taraz)— Lincoln Continental
2. Rzaev Zaır (Almaty) — Rolls-Royce Cullinan
3. Gennadıı Chernávskıı (Taraz) — Volkswagen T2A