Almatyda Qala kúni merekesi jáne Halyq Qaharmany, Memlekettik syılyqtyń laýreaty, Qazaqstannyń eńbek sińirgen qaıratkeri, kompozıtor, dırıjer ári kúıshi Nurǵısa Tilendıevtiń týǵanyna 100 jyl tolýyna oraı memorıaldyq mýzeıde qaıta jańǵyrtylǵan ekspozısıa ashyldy.
Almaty ákimi Darhan Satybaldy, kompozıtordyń qyzy dırıjer, Qazaqstannyń eńbek sińirgen qaıratkeri Dinzýhra Tilendıeva, sondaı-aq zıaly qaýym men mádenıet ókilderi jańartylǵan mýzeıdi aralap kórdi. Qala basshysy atap ótkendeı, mýzeıdiń jańarýy megapolıstiń mádenı ómirindegi mańyzdy oqıǵa bolyp otyr.
1979-1998 jyldary kompozıtor otbasymen turǵan bul úı búginde memorıaldyq mýzeı retinde jumys isteıdi. Munda qazaq mýzykasynyń ozyq týyndylary dúnıege kelgen, shyǵarmashylyq kezdesýler men repetısıalar ótken sol kezeńniń atmosferasy saqtalǵan.
Jańǵyrtýdan keıin kórme zaldarynyń aýmaǵy 161 sharshy metrge deıin ulǵaıdy. Mýzeıge zamanaýı mýltımedıalyq qurylǵylarmen jabdyqtalǵan eki jańa zal qosyldy. Sondaı-aq, biregeı qoljazbalar, arhıvtik sýretter men kompozıtordyń jeke zattarynan turatyn sırek ekspozısıa usynyldy.
Ekspozısıadaǵy eń qundy jádigerdiń biri 1934 jyly Ahmet Jubanov syıǵa tartqan ańyzǵa aınalǵan «Darıǵa-dombyra». Kompozıtordyń jary Darıǵa Tilendıevanyń esimimen atalǵan qasıetti dombyra onyń shyǵarmashylyq shabyt nyshanyna aınaldy. Sondaı-aq, mýzeıde kompozıtordyń anasy syılaǵan fortepıano da saqtalǵan.
Buǵan deıin Almaty qalasy mýzeıler birlestigi Parıjdegi IýNESKO shtab-páterinde uly qazaq kompozıtorynyń murasyna arnalǵan mereıtoılyq kórme ótkizgen bolatyn. Nurǵısa Tilendıevtiń 100 jyldyǵy IýNESKO-nyń mereıtoılyq datalar tizimine engizilip, qazaq mýzykasy danyshpanynyń álemdik mádenıetke qosqan úlesi halyqaralyq deńgeıde moıyndaldy.