Tanymal ánshiniń Almatynyń Ortalyq stadıonynda ótetin jeke án keshine arnalǵan bıletterdiń 90% satylyp ketken.
Tipti óner ıesiniń sheteldik tyńdarmandary da alystan at arytyp Almatyǵa kelip jatyr. Keıbir qonaq úılerde bos oryn qalmapty. Ánshi Dımash Qudaıbergenniń konsertin asyǵa kútip júrgender kóp, dep habarlaıdy Almaty-akshamy.kz 24.kz-ke silteme jasap.
Qazirdiń ózinde 21 myńnan astam bılet satylyp ketken. Bul – jalpy bılet sanynyń 90%. Ol tek konsert ótetin Ortalyq stadıondaǵy negizgi oryn ǵana. Odan bólek fanattar aımaǵynda, ıaǵnı sahna aldynda taǵy 10 myńǵa jýyq kórermen konsertti tamashalaı alady.
«Bılettiń baǵasy 8-10 myń teńgeden bastalyp, sahnaǵa jaqyn oryndardyń quny 40 myń teńgege deıin jetti. Qazir fanaımaqta 10 myń teńgelik jáne qymbat oryndardyń bıletteri ǵana bar. Bılet satylymǵa shyqqan kúnnen beri satyp alýshylardyń sany artyp jatyr», - deıdi onlaın bılet satatyn kompanıanyń bas dırektory Vıktorıa Torgýnakova.
Álemge tanymal óner ıesiniń sheteldik jankúıerleri de az emes. Satylǵan bıletterdiń 5 myńǵa jýyǵyn ózge eldiń tyńdarmandary ıelengen. Naqtyraq aıtsaq, Shveısarıa, Fransıa, Ýkraına, Qytaı, Katar, AQSH, Brazılıa jáne Argentına syndy jalpy sany 50 eldiń azamattary konsertke bılet alypty. Tipti birqatar qonaq úılerde qazirdiń ózinde bos oryn qalmaǵan.
«Aǵymdaǵy jyldyń ekinshi toqsanynyń qorytyndysy boıynsha, Almaty qalasyndaǵy qonaq úılerdiń tolýy 38,4% qurady. Ol ótken jyldyń sáıkes ýaqytymen salystyrǵanda 13,7% ósti. Al keıbir kúnderi belgili bir is-shara osyndaı Dımash Qudaıbergenniń konsertterine baılanysty qonaq úılerdiń tolýy 80% deıin jetedi», - qalalyq Týrısik-aqparattyq ortalyq dırektorynyń orynbasary Baýyrjan Pazylhaıyr.
Ánshiniń konsertine arnalǵan bıletter 14 shildeden bastap saýdaǵa shyǵarylǵan. Alǵashqy eki táýlikte 10 myńnan asa bılet satylypty. Dımash Qudaıbergenniń jeke konserti 23 qyrkúıek kúni keshki saǵat segizde Ortalyq standıonda ótedi.