Almaty máslıhatynyń depýtattary arasynda kim qanshalyq belsendi? Bul suraqtyń jaýabyn bilý úshin Almaty qalasy Máslıhatyna resmı suraý joldadyq, - dep habarlaıdy aqshamnews.kz tilshisi.
Saýalda jergilikti ókildi organ depýtattarynyń jergilikti atqarýshy organdarǵa joldaǵan saýaldary boıynsha 4 suraq qoıyldy. Maqsatymyz saýaldardyń sany arqyly birmandatty okrýgter jáne partıalar fraksıalary boıynsha salystyryp, belsendiligin anyqtaý boldy.
Majorıtarly saılaý júıesi óz jemisin berip jatyr
Berilgen jaýaptardy taldaı kele, partıa fraksıalaryna qaraǵanda birmandatty okrýgter boıynsha saılanǵan depýtattardyń belsendirek ekenin baıqadyq. Demek, 2023 jyly saılaýǵa engizilgen majorıtarly saılaý júıesi óz jemisin berip jatyr. Bul pikirimizge syn aıtýshylar da bolýy múmkin. Alaıda derek osy oıymyzdy dáleldep tur.
Bıyl 3 qańtar–16 mamyr aralyǵynda Máslıhat depýtattary 533 saýal joldaǵan. Onyń 312-si birmandatty okrýgter boıynsha saılanǵan depýtattarǵa tıesili. Demek, saýaldyń jartysynan kóbin (58,5%) ózin-ózi usynǵandar joldaǵan.
Saýaldy kóp joldaǵan kimder?
Birmandatty depýtattardyń ishinen Tımýr Eleýsizov (42), Altynaı Kóbeeva (39) jáne Qarashash Djýzeeva (28) eń kóp saýal joldaǵan. Al Z.Ómirbaeva, M.Ótemisov, Á.Nábıev, Á.Tursyn, E.Saýranbaev, E.Raqyshev, B.Ibragımuly, D.Tastekeev, S.Kozlov jáne Q.Begalın sekildi depýtattardyń árqaısysy 4 aı ishinde 10-nan az saýal joldaǵan eken.
Tómendigi kesteni Máslıhattyń resmı jaýabyna súıene otyryp daıyndadyq. Onda birmandatty okrýgter boıynsha saılanǵan depýtattardyń okrýgteri men joldaǵan saýal sandary tolyq kórsetilgen.
"AMANAT" kósh bastap tur, alaıda...
2023 jylǵy saılaý qorytyndysy boıynsha Almaty qalasy Máslıhatyna 5 saıası partıa ótken. Olar "AMANAT", "Respýblıka", "Aq jol", "Baıtaq" jáne Qazaqstannyń Halyq partıasy (QHP). Depýtattyq saýaldar sany boıynsha "AMANAT" partıasy senimdi túrde kósh bastap tur. Bıleýshi partıa depýtattary 422 saýal joldaǵan.
Alaıda bul sannyń ishinde birmandatty okrýgter boıynsha saılanǵan depýtattar da bar. Ózin-ózi usynǵan 21 depýtattyń 14-i "AMANAT" partıasynyń múshesi. Olarǵa A.Kóbeeva, J.Dastan, E.Bakarasova, D.Ramazanov, G.Bekenova, M.Zýleev, B.Jumabaev, A.Shın, Z.Talǵatov, Z.Ómirbaeva, Á.Nábıev, E.Saýranbaev, B.Ibragımuly jáne S.Kozlov kiredi. Osy atalǵan depýtattardyń saýaldaryn qosatyn bolsaq 217 bolady. Demek, "AMANAT" partıasy tizimi boıynsha saılanǵandar 205 depýtattyq saýal joldaǵan. Budan 422 saýaldyń jartysynan kóbin birmandatty okrýgten saılanǵan depýtattar joldaǵanyn kóremiz.
Osy oraıda, myna jáıtty eskerte ketken jón. Dýlat Ramazanov 2023 jyly saılaý aldynda ózin partıasyz ekeni týraly aqparat bergen. Biraq Máslıhat saıtynda "AMANAT" partıasynyń múshesi ekeni jazylǵan. Sol sıaqty, Andreı Shın saılaý aldynda osy partıa múshesi ekeni týraly aqparat bergen, alaıda qazir saıtta qaı partıa múshesi ekeni jazylmaǵan. Al Tımýr Eleýsizov osydan eki jyl buryn "Baıtaq" partıasy múshesi ekeni týraly aqparat bergen. Biraq qazir saıtta partıasyz dep jazylǵan.
Qorytyndylaı kele, Almaty qalasy Máslıhaty depýtattary saýal joldaýdan belsendi ekenin baıqadyq. Qala berdi, barlyq saýalǵa jergilikti atqarýshy organdar jaýap berdi delingen resmı Máslıhattyń jaýabynda. Sondaı-aq, birmandatty okrýgten saılanǵan depýtattar fraksıalarǵa qaraǵanda belsendi jumys istep jatyr.