Májilis depýtaty Erjan Beısenbaev Premer-mınıstrdiń birinshi orynbasary Roman Sklárǵa joldaǵan saýalynda 4 paıyzben avtonesıe berýdi jalǵastyrýǵa qatysty saýal joldady, dep habarlaıdy Almaty-akshamy.kz.
Qazirgi ýaqytta «Operator ROP» JSHS túrindegi olıgopolıa qatysýshylaryna qatysty rezonansty sot prosesi júrip jatqany barshaǵa aıan. Búgingi tańda ROP fýnksıalary «Jasyl Damý» AQ-ǵa berilgenimen másele joıylǵan joq, - deıdi depýtat.
«Aq jol» dempartıasyna kásipkerler habarlasyp, Ekologıa departamentteri 2019-2021 jyldarǵa arnalǵan ýtılızasıa tólemderin tólemegeni úshin ákimshilik aıyppul salǵanyn aıtyp, shaǵymdanyp jatqan kórinedi, dep jazdy BAQ.kz.
Mundaı óndirip alý zańsyz, óıtkeni «Jasyl Damý» AQ-nyń rekvızıtteri olarǵa tek 2023 jyly ǵana berilgen, al ýtılızasıa tólemderi talap aryzdar qoıylǵanǵa deıin tólenip qoıǵan. Oǵan qosa, olar Prezıdenttiń tekserýler júrgizýge moratorıı engizý týraly Jarlyǵyn buzyp otyr. Búgingi kúni osy negiz boıynsha 690-nan astam kásipkerlik sýbektisi jaýapkershilikke tartylǵan degen aqparat bar, - dep atap ótti Erjan Beısenbaev.
Aıtýynsha, ROP aıasyndaǵy tehnıkany ýtılızasıalaýǵa arnalǵan «RecyclingCompany» JSHS zaýyty ekinshi jyl jumys istemeı tur, sebebi, «Operator ROP» JSHS qatysty qylmystyq is aıasynda kásiporynǵa tyıym salynǵan.
Alaıda ýtılızasıa júrgizilip jatpaǵanymen «Jasyl Damý» azamattar men bıznesten ýtılalym alýdy jalǵastyryp keledi. Sondaı-aq kásipkerlerdiń málimetinshe, qazirgi operator kásiporyn jumysynyń toqtaýy men tergeýdiń júrip jatqanyn syltaý etip, 4 aı boıy óndirýshilerge túsken qarjyny úlestirmegen, alaıda, bul onyń ózine joq ýtılalymdy jınaýyna esh kedergi keltirmeı otyr. Sondyqtan atyshýly ýtılalymnan túsip jatqan mıllıardtaǵan qarjy taǵy qaıda ketip jatyr degen saýal týyndaıdy? – dedi májilismen.
Depýtat atap ótkendeı, Indýstrıa mınıstrligi jeńildetilgen avtonesıelerdi 4 paıyzben qarjylandyrýdy toqtatý týraly sheshim qabyldady.
Ýtılalym júıesi qazaqstandyq kólikterdiń óndirisi men qoljetimdiligin qamtamasyz etý maqsatynda engizilgeni belgili. Biraq sheneýnikter muny umytyp ketken sıaqty, - dep aıtty Beısenbaev Májiliste.
«Aq jol» depýtattyq fraksıasy Úkimetke mynadaı talaptar qoıdy:
1) Ákimshilik quqyq buzýshylyq faktisi anyqtalǵanǵa deıin ýtılalym tólemin tólegen kásipkerlerdi ákimshilik qýdalaýdy toqtatý, olarǵa qoldanylǵan sanksıalardy, onyń ishinde eskertýlerdi joıý;
2) «RecyclingCompany» JSHS qyzmeti toqtatylǵan kezeńde avtokólikter men tehnıkalardy ýtılızasıalaý úshin jınalǵan qarajattyń paıdalanylýy týraly aqparatty jarıalap, atalǵan zaýyttyń qyzmetin qalpyna keltirý merzimderi týraly aqparat berý;
3) 4% mólsherlemesimen avtonesıe berýdi jalǵastyryp, osy maqsattarǵa ýtılalymnyń paıdalanylmaǵan qarajattaryn qosymsha bólý;
4) Tipti, bolmasa, kólikterdi ýtılızasıalaý zaýytynyń toqtap turǵan kezeńinde ýtılalym tólemin toqtatýdy qarastyrý.