QR Úkimetiniń Qaýlysymen «Densaýlyq saqtaýdy damytý respýblıkalyq ortalyǵy» SHJQ RMK «Salıdat Qaıyrbekova atyndaǵy Densaýlyq saqtaýdy damytý ulttyq ǵylymı ortalyǵy» SHJQ RMK bolyp qaıta ataldy, dep habarlaıdy almaty-akshamy.kz.
DSDRO 1994 jyly Almatyda Densaýlyq saqtaýdyń medısınalyq jáne ekonomıkalyq problemalarynyń ǵylymı ortalyǵy bolyp quryldy. Ortalyqtyń quqyqtyq mırasqory – Densaýlyq saqtaýdy damytý ınstıtýty Astanaǵa kóshirilip, 2011 jyly Respýblıkalyq aqparattyq-taldaý ortalyǵymen birigý arqyly Respýblıkalyq densaýlyq saqtaýdy damytý ortalyǵy ataýyn aldy. Ortalyq qyzmetindegi mańyzdy baǵyttardyń bastaýynda Salıdat Qaıyrbekova turdy, dep habarlaıdy QR DSM baspasóz qyzmeti.
«Táýelsiz Qazaqstannyń densaýlyq saqtaý júıesiniń damý tarıhynda QR Densaýlyq saqtaý mınıstri Salıdat Zekenqyzy Qaıyrbekovanyń róli erekshe. Salıdat Zekenqyzy qatardaǵy dáriger-nevropatologtan bastap Qazaqstan Respýblıkasynyń Densaýlyq saqtaý mınıstrine deıin, elimizdiń densaýlyq saqtaý júıesiniń barlyq deńgeılerinen ótti. Tereń kásibı bilimi, uıymdastyrýshylyq qabileti, kóshbasshylyq qasıeti men jaýapkershilik, oılaý ótkirligi, qarapaıymdylyǵynyń arqasynda Salıdat Zekenqyzy QR Densaýlyq saqtaý júıesin damytý jolynda kúrdeli mindetterdi sheship, tıimdi komanda qura aldy, sondaı-aq medısınalyq ortada joǵary bedelge ıe bola bildi», – dep atap ótti QR Densaýlyq saqtaý mınıstri Alekseı Soı.
Qazaqstan Respýblıkasynyń alǵashqy Densaýlyq saqtaý áıel-mınıstri, QR Memleket jáne qoǵam qaıratkeri, densaýlyq saqtaý salasyndaǵy qaıratker, medısına ǵylymdarynyń doktory S. Qaıyrbekova óz ómirin halyqqa qyzmet etý jolyna arnady, otandyq densaýlyq saqtaý salasyna zor eńbek sińirdi.