Exit poll-ǵa qatysqan uıymdardyń suhbatshylary qazir QR Konstıtýsıasyna ózgerister men tolyqtyrýlar engizý jónindegi referendýmǵa saılaýshylardyń qatysýy men daýys berý barysy týraly saýalnama júrgizip jatyr.
Exit poll búgin Qazaqstannyń barlyq aımaqtarynda belsendi jumys isteýde. Bul – saılaý nátıjelerin resmı túrde sanaý aldynda jyldam aldyn ala anyqtaý ádisi.
Almatydaǵy «Astana» keshendi áleýmettik zertteýler ınstıtýtynyń ıntervúeri Ilás Kýbrıanov mundaı formatta birinshi ret jumys istep turǵan joq ekenin atap ótti. Onyń aıtýynsha, daýys berý prosesi – ol úshin qyzyq tájirıbe.
Jas jigittiń ózi de bir kezderi saılaý komısıasynyń múshesi, qoǵamdyq birlestikterden baıqaýshy bolǵan. Ilás Kýbrıanov №75 mektep janyndaǵy №140 saılaý ýchaskesine daýys berip, saýalnama júrgizýdi jón kórgenin atady. Onyń málimetinshe, almatylyqtar tańerteńnen beri belsendi túrde daýys berýge qatysqan.
«Men barǵan saılaý ýchaskesinde belsendilik óte joǵary boldy, onyń dáleli biz munda saılaý ýchaskesi ashylǵanǵa deıin keldik. Sol kezdiń ózinde daýys berýge kelgender kóp boldy. Egde jastaǵylar da, jastar da belsendi boldy. Barlyǵy merekelik kóńil-kúıde, kózderinde bolashaqqa degen senim kórinip turdy. Saılaýǵa kelgenderden ózgertýlerdi qoldaıtynyn, ne qoldamaıtynyn suradyq. Kelgenderdiń kópshiligi ózgeristerge «ıá» dep daýys bergen, «qarsymyn» dep jaýap bergender az. Arasynda jaýap berýden bas tartqandar da boldy, bul – olardyń quqyǵy», – dedi I.Kýbrıanov.
Referendýmda daýys bergen halyqtyń oń kózqarasy men belsendiligi Nur-Sultan qalasynda da baıqalady. «Qoǵamdyq pikir» zertteý ınstıtýtynyń exit poll ókili Ádilbek Asan «Astana Opera» memlekettik opera jáne balet teatrynyń №115 saılaý ýchaskesinde daýys bergen. Ol atalǵan aımaqta aǵa býyn ókilderi de, jastar da birdeı belsendi daýys bergenin málimdedi.
«Adamdardyń kóńil-kúıi pozıtıvti. Men ýchastkede tańǵy 7:00-den bastap, 19:00-ge deıin bolamyn. Osy aralyqta kelgen adamdar óte kóp boldy. 115-shi saılaý ýchaskesinde kóp adam tirkelgen. Jastar da, aǵa býyn da daýys berdi. Saılaý ýchaskesinen shyǵa beriste azamattardyń qalaı daýys bergenin suradyq. Saýalnamaǵa qatysý erikti boldy. Óz ustanymdaryn aıtýdan bas tartqandar da kezdesti. Alaıda ýchastkede eshkim eshteńege shaǵymdanǵan joq. Barlyǵynyń kóńil-kúıi kóterińki boldy», – dedi Á.Asan.