Qyrǵyzstanda burynǵy prezıdent Almazbek Atambaevtyń otbasyn Bishkek mańyndaǵy Qoı-Tash aýylyndaǵy úıinen sot oryndaýshylary kúshtep shyǵardy, dep habarlaıdy Aqshamnews.kz tilshisi.
Eks-prezıdenttiń uly Qadyrbek Atambaev bul týraly áleýmettik jelidegi paraqshasynda jazyp, bıliktiń áreketin "zańsyzdyq" dep baǵalady.
"Anamdy jáne otbasymnyń ózge múshelerin Qoı-Tashtaǵy úıden zańsyz shyǵaryp jatyr. Bul - ata-babamyzdyń jeri. Bar bolǵany 100 metr jerde barlyq týystarymyz jerlengen. Bul - naǵyz bassyzdyq", - dedi ol.
Onyń aıtýynsha, is qalalyq sotta qaralyp jatqanymen, sot oryndaýshylary "joǵarydan kelgen nusqaý" boıynsha esh eskertýsiz kelip, otbasy múshelerin kóshege shyǵaryp, zattaryn konteınerge tıep áketken.
Atambaevtyń qyzy Álıa Shaǵıeva da resmı qujat nemese sot sheshimi kórsetilmegenin aıtyp, otbasynyń jaýyn astynda qalǵanyn jetkizdi. Qazir olar týystarynyń úıinde ýaqytsha turyp jatyr.
Memlekettik aktıvterdi basqarý agenttigi úıdiń sot sheshimimen memleket menshigine qaıtarylǵanyn málimdedi. Bul jerge qarttar úıi men 500 balaǵa arnalǵan balabaqsha salý josparlanyp otyr. Qurylys jumystary taıaýda bastalyp, kelesi jyly aıaqtalýy tıis.
Eske salaıyq, 2019 jyly Qoı-Tashta Atambaevty ustaý operasıasy kezinde qaqtyǵys bolyp, bir arnaıy jasaq qyzmetkeri qaza taýyp, júzden astam adam jaralanǵan edi. 2022 jyly bastalǵan sot prosesine keıin jemqorlyq isteri qosyldy.
2023 jyly Atambaev Ispanıaǵa emdelýge ketip, sodan beri otanyna oralǵan joq. Bıyl maýsymda sot ony 11 jyl 6 aıǵa bas bostandyǵynan aıyrylyp, múlkin tárkileý jáne memlekettik marapattarynan aıyrý týraly úkim shyǵardy. Prezıdent Sadyr Japarov úkimdi qatań dep atap, eger Atambaevtyń jaqyndary ótinish bildirse, ony keshirýge daıyn ekenin jetkizgen.