Aǵany-inili Mahmud pen Tórehan Sabyrhan Anglıada ótken bokstan Álem Chempıonatynda altyn ıelendi. Aǵaıyndy boksshylar týraly ne belgili? Tolyǵyraq Aqshamnews.kz tilshisi baıandaıdy.
Qazaqstandyq boks jankúıerleri úshin aǵaıyndy Sabyrhandardyń jeńisi – qos qýanysh. Kúni keshe Anglıanyń Lıverpýl qalasynda ótken chempıonatta aǵaıyndylardyń biri 55 keli, ekinshisi 70 keli salmaq dárejesinde óner kórsetip, el qorjynyn altynmen toltyrdy.
instagram.com/sabyrkhan_makhmud/
Chempıondardyń týǵan jeri
Mahmud Sabyrhan 2001 jyly 9 qyrkúıekte, al inisi Tórehan Sabyrhan 2006 jyly Túrkistan oblysy, Maıatas aýylynda týǵan.
Ekeýiniń de bapkeri – İlıas Oralbekov. Dál osy ustaz aýyl mektebiniń tarıh kabınetin jattyǵý zalyna yńǵaılap, aǵaly-iniliden chempıon tárbıelep shyǵardy.
"Aǵam ekeýmiz aýyldyń tóbesine deıin júgirip, sonda jattyǵamyz, birinshi bolýǵa umtylamyz, biraq aǵam ozyp kete beretin. Ákem de aǵama jaı, maǵan qatty ur deıtin", - deıdi Tórehan Sabyrhan suhbattarynyń birinde.
Jigitterdiń ákesi Aıdar myrza oladyń balalyq shaǵy týraly aıtty.
"Tórehan kishkentaı kezinde bıshi edi, án de aıtatyn. Aǵasynyń artynan erip, bokspen aınalysty. Bul úıde chempıon degen ataý joq, ekeýi de úı jınaıdy, mal qaraıdy. Bala kezde Mahmud chempıon bolamyn dese, Tórehan ákim bolamyn deıtin", - dep eske aldy ol.
UOK
Mahmud Sabyrhan
Boksshy Mahmud Aıdarhanuly 55 keli salmaq dárejesinde óner kórsetedi. Sportshy - Ulttyq quramanyń múshesi.
24 jastaǵy Mahmud Sabyrhan ekinshi ret Álem chempıony ataǵyna ıe bolyp otyr. Ol 2021 jyly Belgradta ótken álem chempıonatynda kúmis, 2023 jyly Tashkentte altyn medal alǵan bolatyn.
Jyldamdyǵy men aıqyn tehnıkasy arqasynda Mahmud qazir qazaqstandyq bokstyń jańa tolqynyndaǵy kóshbasshylardyń biri sanalady.
UOK
Tórehan Sabyrhan
Tórehan Aıdarhanuly - jastar arasynda tórt dúrkin Azıa chempıony atanǵan alǵashqy qazaqstandyq. Budva qalasynda ótken jastar arasyndaǵy álem chempıonatynda qarsylasyn jeńip, altynǵa qol jetkizdi. "Tatosh" laqap atymen tanylǵan ol bokspen segiz jasynda shuǵyldana bastady. Óz aıtýynsha, bala kezinde tolyqtaý bolyp, sportpen múlde baılanysy bolmaǵan. Biraq alǵashqy jattyǵýdan keıin onyń bapkeri İlıas Oralbekov balada talant baryn baıqaǵan.
"Kóbi chempıon bolǵan soń "Amerıka syndy myqty jerde turatyn shyǵarsyń" deıtin. Joq, qansha jerden chempıon bolsam da, qara shańyraqta turamyn. Aýyldan ketpeımin, shetelde júrsem úıdi saǵynamyn. Osynda júrsem sharshamaımyn", - deıdi ol.
Aǵasy ekeýiniń armanyn aıtty.
"Mekteptiń artynda bos oryn bar, sol jerde sport mektebin salǵymyz keledi. Buryn jattyǵyp júrgende zalǵa syımaı qalatynbyz, sol kezde chempıon bolyp, ashsaq eken dep armandaıtynbyz", - dedi sportshy.
Aıta keteıik, buǵan deıin halyqaralyq World Boxing uıymy Mahmud pen Tórehan Sabyrhandardyń jetistikterin erekshe atap ótken edi.
"Aǵaıyndylar Lıverpýlde ótken Álem chempıonatynda qarsylastarynyń bárin oısyraty jeńip, altyn medal ıelendi.
Mahmud 55 keli salmaqta jeńimpaz atansa, Tórehan 70 kelide óner kórsetti. Eki baýyr, eki altyn, alynbas kúsh", - delingen jazbada.