Atyraý oblysynda tabıǵı sıpattaǵy tótenshe jaǵdaı jarıalandy, dep habarlaıdy Aqshamnews.kz tilshisi.
Belgili bolǵandaı, Qurmanǵazy aýdanynyń ákimi bul týraly sheshimdi bıyl 31 shildede-aq qabyldaǵan, alaıda bul jaıly aqparat endi ǵana belgili bolyp otyr. Tótenshe jaǵdaı jarıalaýǵa aýdan aýmaǵyndaǵy Qıǵash jáne Sharon ózenderi men olardyń arnalary, sondaı-aq Kaspıı teńiziniń jaǵalaýynyń taıazdanýy saldarynan gıdrologıalyq ahýaldyń nasharlaýy sebep bolǵan.
Oblys ákimdiginiń málimetinshe, sý aıdyndarynyń tartylýy baǵaly balyq túrleriniń ýyldyryq shashýy men kóshýine kedergi keltirip, tabıǵı tepe-teńdikke keri áser etip jatyr. Bul jaǵdaı shekaralyq jáne quqyq qorǵaý organdarynyń, sondaı-aq balyq sharýashylyǵymen aınalysatyn kemelerdiń qozǵalysyn qıyndatady. Keıingi jyldary kásibı balyq aýlaý jaǵdaıy da kúrt nasharlaǵan. Qazirdiń ózinde balyq sharýashylyǵy sýbektilerinen kóptegen shaǵymdar túsken.
Sonymen qatar taǵy birqatar másele bar:
-
arnalar arqyly sý shyǵa almaı, jaıylym men egistikke jetpeı jatyr;
-
arnalardaǵy sýdyń joqtyǵy aýyl sharýashylyǵy men mal sharýashylyǵyna teris áser etip jatyr.
Qurmanǵazy aýdany ákimdigi janynan tótenshe jaǵdaıdyń saldaryn joıý boıynsha jedel shtab quryldy. Onyń basshylyǵyna aýdan ákiminiń orynbasary taǵaıyndaldy. Qazirgi ýaqytta arnaıy is-sharalar jospary bekitilip, tótenshe jaǵdaıdy joıý úshin qajetti tehnıkalyq jáne qarjylyq resýrstardy esepteý jumystary júrgizilip jatyr.
Jospar boıynsha Qıǵash pen Sharon ózenderiniń, sondaı-aq Kaspıı teńiziniń jaǵalaýyndaǵy Jarkósin jáne Ganúshkın arnalarynyń túbin tereńdetý jumystary júrgizilip, kemelerdiń júrip-turýy men baǵaly balyqtardyń ýyldyryq shashýyna jaǵdaı jasaý kózdelip otyr.