Búgin Túrki mádenıeti men murasy qorynyń qurylǵanyna 13 jyl toldy.
Qor 2012 jylǵy 23 tamyzda Túrki memleketteri uıymynyń Bishkek qalasynda ótken Samıti barysynda Qazaqstan, Qyrǵyzstan, Túrkıa Memleket Basshylarynyń qoldaýymen jáne Ázerbaıjan Respýblıkasynyń Prezıdentiniń bastamasymen quryldy.
«Ádebıet jáne óner» portaly osy 13 jyldyq tarıhqa, ásirese sońǵy jylǵy teńdessiz qyzmetke nazar aýdara otyryp, Túrki áleminiń ǵajaıyp ári kúnshýaqty qalasy Bakýde ornalasqan Qor túrki halyqtarynyń qolóneri, fólklory, tarıhy, ádebıeti jáne ózge de mádenıet salalaryndaǵy murasyn saqtaý, damytý, nyǵaıtý jáne nasıhattaý baǵytyndaǵy qyzmetin tabysty jalǵastyryp kele jatqanyn atap ótedi.
Túrki Mádenıeti qorynyń prezıdenti, Qazaqstannyń jáne álemniń tanymal kompozıtory Aqtoty Raıymqulova atap ótkendeı, Túrki Mádenıeti men Murasy qorynyń qurylýy Ázerbaıjan Respýblıkasy Prezıdentiniń bastamasynan týyndap, Qazaqstan, Qyrǵyzstan jáne Túrkıa prezıdentteriniń qoldaýymen 2012 jylǵy 23 tamyzda Bishkekte ótken Túrki keńesiniń (qazirgi Túrki Memleketteri Uıymy) Samıtinde sheshim qabyldanǵan. Qor qurylǵan kúnnen búginge deıingi basty maqsatymyz – Túrki áleminiń baı murasyn jáne kópǵasyrlyq tarıhyn zertteý, saqtaý jáne nasıhattaý bolyp keledi. Osy mısıa aıasynda Túrki Mádenıeti men Murasy qory birqatar mańyzdy is-sharalardy júzege asyryp, mádenı yntymaqtastyqtyń keńeıýine jáne ortaq qundylyqtardyń álemge tanystyrylýyna úles qosty.
Aldaǵy ýaqytta da Qor Túrki memleketteri arasyndaǵy mádenı baılanystardy nyǵaıtý, ortaq túrki tarıhy men murasyn jańa zertteýlermen tolyqtyrý, sondaı-aq zamanaýı tehnologıalar arqyly keń aýdıtorıaǵa jetkizý baǵytynda óz jumysyn jalǵastyra bermek.
Túrki áleminiń birligi men murasy – bolashaq urpaqqa qaldyrar eń uly amanat!
Atap ótkenimizdeı, Ázerbaıjan Prezıdentiniń bastamasymen, Qazaqstan, Qyrǵyzstan jáne Túrkıa Memleket basshylarynyń qoldaýymen qurylǵan, keıinnen Ózbekstannyń qosylýymen qataryn keńeıtken jáne aldaǵy ýaqytta Majarstan men Túrikmenstanmen odan ári tolyǵady dep kútiletin bul uıym túrki halyqtarynyń ulttyq jáne rýhanı qundylyqtaryn nasıhattaý baǵytynda kóptegen qundy jobalardy júzege asyryp keledi: kitaptar jaryq kórýde, kórnekti zertteýshi ǵalymdardyń qatysýymen kórmeler, konferensıalar uıymdastyrylýda. Túrki dúnıesiniń materıaldyq mádenıet eskertkishterin qaıta qalpyna keltirý baǵytynda da jumystar atqarylýda.
Aqtoty Rahmetollaqyzynyń aıtýynsha, túrki dúnıesiniń tarıhy men mádenıetin birlese zertteý úshin barlyq túrki uıymdarynyń bas biriktirip, birlese eńbek etýine qolymyzdan kelgenniń bárin jasady.