31 tamyzdan bastap Qazaqstanda qurylys júrip jatqan úılerden baspana satyp alý tártibin ózgertetin túzetýler kúshine enedi, dep habarlaıdy aqshamnews.kz
Bul sharalar úleskerlerdiń quqyǵyn qorǵaýǵa baǵyttalǵan. Túzetýler 30 shildede Memleket basshysy qol qoıǵan “Qazaqstan Respýblıkasynyń keıbir zańnamalyq aktilerine turǵyn úı qurylysyna úlestik qatysý, avtomobıl joldary jáne múgedektigi bar adamdardy tasymaldaý qyzmetterin kórsetý máseleleri boıynsha ózgerister men tolyqtyrýlar engizý týraly” zańǵa engizildi.
Jańa erejelerge sáıkes, kóppáterli turǵyn úı nemese jeke turǵyn úıler kesheninen úles satyp alýǵa baılanysty barlyq tólem tek qana bankter arqyly qolma-qol aqshasyz júrgizilýi tıis. Iaǵnı, qurylys salýshyǵa qolma-qol aqsha berýge bolmaıdy, qarajat ýákiletti kompanıanyń banktik shotyna aýdarylady. Bul mámilelerdiń ashyqtyǵy men qaýipsizdigin arttyrady.
Mańyzdysy, bank tólemdi tek úlestik qatysý sharty biryńǵaı aqparattyq júıede tirkelgen jaǵdaıda ǵana ótkizedi. Eger shart tirkelmese, tólem jasaý múmkin bolmaıdy.
Endi úlestik qatysý týraly zań talaptary oryndalmasa, jańadan salynyp jatqan úıden baspana satyp alýǵa baılanysty kez kelgen shart jasaýǵa tyıym salynady. Zańda:
Jańa salynyp jatqan kóppáterli turǵyn úı nemese jeke turǵyn úıler kesheninen páterge jáne (nemese) turǵyn emes úı-jaıǵa, jeke turǵyn úıge ne olardyń úlesine menshik quqyǵyn nemese ózge de zattyq quqyqtardy satyp alýǵa baılanysty jeke nemese zańdy tulǵamen, sondaı-aq birlesken qyzmet týraly shart boıynsha áreket etetin tulǵamen (jaı seriktestik, konsorsıým) kez kelgen shart úlestik qatysý týraly zań talaptary saqtalmaı jasalmaıdy, – dep kórsetilgen.
Bankter men ıpoteka beretin uıymdarǵa qurylys salýshynyń úleskerlerdiń aqshasyn tartýǵa ruqsaty nemese úlestik qatysý kepildigi bolmaǵan jaǵdaıda, qurylys kezeńindegi baspana satyp alýdy nesıeleýge tyıym salynady.
Sonymen qatar ýákiletti kompanıalar halyqaralyq reıtıńi “B+”-ten tómen emes bankterde valútalyq shot ashýǵa mindetteledi.
Úlestik qatysý tásili retinde Biryńǵaı operator kepildigin alý kózdelgen jaǵdaıda, ýákiletti kompanıa ekinshi deńgeıli bankten halyqaralyq reıtıńtik agenttiktiń “B+”-ten tómen emes reıtıńi bar shetel valútasyndaǵy aǵymdaǵy shot ashýǵa tıis. Eger birneshe agenttiktiń baǵalaýy bolsa, eń tómengisi eskeriledi, – delingen zańda.
Injınırıńtik kompanıalar turǵyn úı qurylysynyń barysy týraly esepti aı saıyn aqparattyq júıeler arqyly ýákiletti organ bekitken nysan boıynsha jergilikti atqarýshy organǵa, sondaı-aq Biryńǵaı operatorǵa nemese ekinshi deńgeıli bankke tapsyryp otyrýǵa mindetti.
Kóppáterli úıdi nemese turǵyn úı keshenin tapsyrý merzimi jobada kórsetilgen kúnnen bes aıdan artyq shegerilmeýi tıis.
Kepildik sharty merziminen buryn buzylǵan jaǵdaıda, kepildik jarnasynyń bir bóligi qurylys salýshyǵa kepildik merziminiń qalǵan ýaqytyna proporsıonaldy túrde qaıtarylady.
Kepildik berý sharty tek barlyq úlestik qatysý sharttary buzylyp, úleskerlerge aqshasy qaıtarylǵannan keıin ǵana buzylýy múmkin, – delingen qujatta.
Sonymen qatar úleskerlerdiń qarajatyn tartýǵa ruqsat nemese úlestik qatysý kepildigi bolmasa, kóppáterli úıler men turǵyn úı keshenderin jarnamalaýǵa tolyq tyıym salynady. Buǵan jeke tulǵalardyń da, zańdy tulǵalardyń da, sondaı-aq birlesken qyzmetke qatysýshylardyń (jaı seriktestik, konsorsıým) qarajatyn tartýǵa baǵyttalǵan kez kelgen jarnama kiredi. Sonymen birge nysandar bekitilgen jobadaǵy turǵyn úı jiktemesine sáıkes bolýy tıis.