Mamyrdyń ár tórtinshi jeksenbisinde QR Qarýly kúshteriniń Mádenıet jáne óner qyzmetkerleri kásibı merekesin atap ótedi.
Qazaqstan armıasyndaǵy shyǵarmashylyq kásipter ókilderin biriktiretin ortalyq mádenıet mekemesi – Qarýly kúshterdiń Ulttyq áskerı-patrıottyq ortalyǵy kópfýnksıonaldy mekeme bolyp tabylady. Bul ortalyq 2015 jyly ashyldy. Oǵan Ortalyq ansámbl, Ortalyq áskerı orkestr jáne óńirlik garnızondardyń fılıaldary kiredi, dep habarlaıdy aqshamnews.kz Qorǵanys mınıstrligine silteme jasap.
Ortalyqta jıyrma myńnan astam eksponaty bar Qarýly kúshterdiń Áskerı-tarıhı mýzeıi jumys isteıdi. Mekeme mamandary sırek kezdesetin tarıhı jáne mádenı eskertkishterdi dáripteý, oq-dárilerdi, qarý-jaraqtardy, áskerı tarıhqa qatysty biregeı qujattar men fotosýretterdi saqtaý jóninde qajyrly jumys atqaryp keledi.
Jastardy áskerı-patrıottyq tárbıeleýge kóp kóńil bólinedi. Búginde 280 myńnan astam bala men jasóspirim «Jas sarbaz» respýblıkalyq balalar-jasóspirimder qozǵalysyna biriktirildi. Qozǵalys tárbıelenýshileri áskerı-patrıottyq klýbtarda, «Jas sarbaz» synyptarynda jáne Smart Sarbaz úıirmelerinde áskerı istiń negizderin meńgerýde. UÁPO janyndaǵy «Jas sarbaz» shyǵarmashylyq stýdıasynda Qarýly kúshterdiń, basqa da áskerler men áskerı quralymdardyń áskerı qyzmetshileriniń balalary dombyra tartýdy, án salýdy jáne horeografıany úırenedi.
Ulttyq áskerı-patrıottyq ortalyqta úshinshi jyl qatar merzimdi qyzmet sarbazdarynyń shyǵarmashylyq vzvody áskerı boryshyn óteıdi. Qyzmet aıaqtalǵan soń jastar aldynda jańa múmkindikter ashylady. Olar joǵary oqý oryndaryna jeńildik sharttarymen túse alady nemese Qarýly kúshterdiń shyǵarmashylyq ujymdarynda kelisimshart boıynsha qyzmetin jalǵastyrýyna bolady.
Qarýly kúshterdiń mádenıet jáne óner qyzmetkerleri ózderiniń kúndelikti eńbekterimen patrıotızmdi qalyptastyrýǵa, eldiń mádenı murasyn saqtaýǵa jáne nyǵaıtýǵa eleýli úles qosyp keledi.