QR Oqý-aǵartý mınıstrliginiń Bilim salasynda sapany qamtamasyz etý komıteti orta bilim berý uıymdarynyń qyzmetine keshendi taldaý júrgizip, elimizdegi eń úzdik 100 mektepti anyqtady.
Bul týraly aqshamnews.kz tıisti vedomstvonyń saıtyna silteme jasaı otyryp habarlaıdy.
Baǵalaý kezinde bilim berý sapasyn syrttaı baǵalaý nátıjeleri, mektepterge arnalǵan PISA jáne PISA halyqaralyq zertteýlerine qatysý, bilim alýshylardyń bilim jetistikteriniń monıtorıńi derekteri (BBJM), memlekettik atestattaý qorytyndylary, oqýshylardyń jetistikteri, pedagogterdiń biliktiligi, ınklúzıvti bilim berý úshin jaǵdaı jasaý, tárbıe jumysynyń tıimdiligi, qolaıly mektep ahýaly, ǵylymı, ekologıalyq jáne áleýmettik jobalarǵa qatysý boıynsha baqylaý jáne baǵalaý is-sharalarynyń qorytyndylary negizinde keshendi taldaý júrgizildi. Sonymen qatar basqarýdaǵy ashyqtyq qaǵıdattary da eskerildi.
«Bul eń úzdik mektepterdiń tizimi ǵana emes. Bul – muǵalimder men mektep ákimshiliginen bastap ata-analar men oqýshylarǵa deıingi barlyq mektep ujymynyń úılesimdi, kásibı jáne jaýapty jumysynyń kórinisi. Ár bala ózin qoldaıtyn, shabyttandyratyn jáne áleýetin ashýǵa kómektesetin mektepte oqýy kerek», – dep atap ótti Bilim salasynda sapany qamtamasyz etý komıteti tóraǵasynyń orynbasary Maıra Meldebekova.
Bastama orta bilim berý sapasyn arttyrýǵa jáne balalardy oqytý men tárbıeleý boıynsha tıimdi ádistemelerdi taratýǵa baǵyttalǵan jáne ol jyl saıynǵy praktıkaǵa aınalady.
Esterińizge sala keteıik, Qazaqstanda 8 myń mektep jumys isteıdi, onda 3,9 mıllıonnan astam bala oqıdy jáne 412 myń pedagog eńbek etedi.
