Premer-Mınıstr Oljas Bektenovtiń tóraǵalyǵymen ótken Úkimet otyrysynda Batys Qazaqstan oblysynyń ákimi Narıman Tóreǵalıev óńirde zardap shekkenderge ótemaqy tóleý jáne qalpyna keltirý jumystarynyń tolyq aıaqtalǵany týraly baıandady.
Jalpy somasy 3,6 mlrd teńgege 9 994 otbasy birjolǵy tólem aldy. 10 222 otbasyna 3,7 mlrd teńgege materıaldyq ótemaqy tólendi. Zardap shekken úılerdi jóndeýge 4,3 mlrd teńge baǵyttaldy, 42,3 mlrd teńgege 2015 páter satyp alyndy jáne 775 jańa turǵyn úı salyndy.
Qurylys jumystaryna 60-tan astam jergilikti kompanıa men 2 myńǵa jýyq adam jumyldyryldy. Sonymen qatar Syrym aýdanynda aldynda júrgizilgen tehnıkalyq tekserý nátıjesinde jóndeýge jatqyzylǵan birqatar turǵyn úılerde ýaqyt óte kele irgetastary shógip, qabyrǵalarynda jaryqtar paıda boldy.
Ákim turǵyndardyń ótinishteri negizinde qaıta tehnıkalyq tekserý júrgizilip, taǵy 38 jańa turǵyn úı salý týraly sheshim qabyldanǵanyn habarlady.
Qurylys jumystary 3 qyrkúıekte bastaldy jáne bıylǵy 15 qazanǵa deıin aıaqtalady. Budan bólek, Oral qalasynda qaıtalama naryqta páter satyp alý boıynsha jumystardy uıymdastyrý barysynda kópbalaly otbasylardan jeke turǵyn úıler salý boıynsha ótinishter kelip tústi. Osyǵan baılanysty, qysqa merzimde Oral qalasynyń Derkól kentinde 28 qosymsha turǵyn úıdiń qurylysy bastaldy. Qurylys jumystary osy jyldyń 1 qazanyna deıin aıaqtalady.
Jalpy, oblys boıynsha sý tasqyny saldaryn qalpyna keltirýge barlyq kózderden 100 mlrd teńge baǵyttaldy.