Babalar izimen ejelgi qonystarǵa saıahat.
Atqa qonǵan belsendi top Saryarqa tórindegi 1250 jyldyq tarıhy bar kóne Bozoq qalashyǵynan ekspedısıaǵa attandy. Sáıgúligin baptap, tulparyn taqymǵa basqan 15 azamat teriskeıdegi ejelgi Botaı qonysyna bet aldy, dep habarlaıdy Almaty-akshamy.kz Qazaqtv.com saıtyna silteme jasap.
Maqsat – dáýirlerdi toǵystyrǵan toǵyz joldyń torabyndaǵy Uly Jibek jolynyń tarmaqtaryn jańǵyrtý, tól mádenıet pen ulttyq dástúrdi nasıhattaý.
"Ár aıaldamada tek qana atpen júrý emes, sol jerdiń mádenıetin tarıhyn búgingi jastarǵa ónege etý. Negizgi maqsatymyz – keshegi júrip ótken batyrlardyń izin jańǵyrtý, atqa miný mádenıetin, dástúrin dáripteý, sonymen qatar Qazaqstan Respýblıkasy rámizderiniń 30 jyldyǵynyń aıasynda, sonymen birge belgili arheolog Vıktor Zaıberttiń eńbegine arnalady", - deıdi ekspedısıa múshesi Dıdar Oralbekuly.
Sapar barysynda salt attylar Aqmola jáne Soltústik Qazaqstan óńirleriniń kıeli mekenderine taban tireıdi. Jol-jónekeı Dombyraly ózeni, Imantaý, Abylaıhan qorymy, Aǵyntaı-Qarasaı batyrlar kesheni syndy birqatar qasıetti jerge at tuıaǵyn tıgizbek.
Tamyry tereń tartqan tarıhı-mádenı oryndardy bir aptanyń ishinde aralap shyǵý josparlanǵan. Ekspedısıa músheleri kúnine 60-70 shaqyrymdy júrip ótip, bas-aıaǵy 450 shaqyrymdy baǵyndyrýdy kózdep otyr.