Bul - túrli qaıyrymdylyq is-sharalar men eko-aksıalar.
Qańtar oqıǵasy kezinde volonterler qıyn jaǵdaıda qalǵan myńnan astam turǵynǵa kómektesti. Bul týraly «QAMQOR CHARITY» qoǵamdyq qorynyń tóraıymy Baǵdat Anarbaeva ÓKQ alańynda ótken brıfıńte aıtty, dep habarlaıdy Almaty-akshamy.kz Baq.kz silteme jasap.
«Máselen, 2022 jyldyń qańtarynda elimizdegi tótenshe jaǵdaı rejımi kezinde qıyn jaǵdaıǵa tap bolǵan adamdarǵa, mekemeler men kásiporyndarǵa kómek kórsetý jumystary uıymdastyryldy. Barlyǵy 1000-nan astam almatylyq otbasyna kómek kórsetildi. Sondaı-aq qaıyrymdylyq sharalarynyń basym bóligi musylmandardyń qasıetti Ramazan aıynda ótkizildi. Eriktiler kóp balaly jáne turmysy tómen otbasylarǵa aýyzashar berip, qala kóshelerinde qurma men sý taratýǵa atsalysty», - dedi Baǵdat Anarbaeva.
Bul rette qoǵamdyq qor tóraıymy almatylyq eriktiler óz mısıasyn bir rettik aksıa emes, ómir saltyna aınaldyrǵanyna senimdi.
«Bizdiń qalamyzda ata-ana qamqorlyǵynsyz qalǵan balalarǵa kásiptik baǵdar berý jáne qysqa merzimdi kásipterge oqytýǵa baǵyttalǵan «Áleýmettik sheberhana» avtorlyq jobasy jumys isteıdi. Onda eriktilerge erekshe ról beriledi. Sonymen qatar, biz Ulagat jobasyna qatysyp, jalǵyzbasty ardagerler men zeınetkerlerge qamqorlyq jasaımyz», - dedi eriktilerdiń kóshbasshysy.
Mereke kúnderi eriktiler úlken jumys atqardy. Bul - túrli qaıyrymdylyq is-sharalar men eko-aksıalar.
Brıfıńtiń taǵy bir qatysýshysy - «Qazaqstan eriktileri lıgasy» QQ tóraǵasy Nursultan Bekqaıyrov eriktiler ózderiniń naqty is-áreketterimen qorshaǵan álemdi, óz elin ózgertetinin atap ótti.
«Biz jeti baǵyt boıynsha jumys jasaımyz. Olar - BILIM, SABAQTASTYQ, QAMQOR, TAZA ALEM, ÚMİT, ASYL MURA, AYALA. Respýblıkalyq «Igi ister marafony», «Ardagerlerdi ardaqtaıyq», «Sháı isheıik», «Jarqyn juldyz» aksıalaryn uıymdastyrýǵa qatysyp kelemiz. Bıylǵy jyldyń basynan beri front-ofıstiń qoldaýymen 80-ge jýyq joba uıymdastyrylyp, júzege asyryldy», - dedi Nursultan Bekqaıyrov.
Onyń aıtýynsha, qalanyń barlyq joǵary oqý oryndarynda «Qazaqstan volonterlar lıgasy» qoǵamdyq qorynyń fılıaldaryn ashý josparlanýda. Búginde bul uıymnyń fılıaldary 23 joǵary oqý ornynda jumys isteıdi.
«Men eriktiler tek jastar qatarynan bolady degen stereotıpterdiń birin joqqa shyǵaramyn. Biz «kúmis volonter» tujyrymdamasyn ázirleýdemiz. Bul - belsendi azamattyq ustanymy bar eńbektenýshi adamdar», - dedi Nursultan Bekqaıyrov.
Sóz sońynda spıkerler erikti bolý qıyn emes, kez kelgen front-ofıske habarlasyp, oqýdan ótip, komandanyń bir múshesi bolý jetkilikti ekenin aıtty. Osyndaı azamattardyń bastamalary medaldarmen, alǵys hattarmen marapattalady.