Barlyǵy 4 myńǵa jýyq adamnyń 5 myń nesıesi ýaqytsha toqtatyldy.
Bul jastardyń esh alańdamaı, Otan aldyndaǵy boryshyn óteýge múmkindik beredi. Sarapshylar da bul bastamany qoldap otyr, dep habarlaıdy Almaty-akshamy.kz 24.kz-ke silteme jasap.
«Merzimdi áskerı qyzmetke shaqyrylǵan azamattarymyz ózi nemese ózi senimhat jazyp bergen týysqandar arqyly nesıeni tólem merzimin keıinge qaldyra alady. Bıylǵy jylda ústimizdegi kóktemgi merzimdi áskerı qyzmetke shaqyrý barysynda kredıttik bereshegi bar azamattar naqtylanyp, jergilikti agenttiktiń fılıaldaryna usynylady», - deıdi QR QK Bas shtaby Uıymdastyrý-jumyldyrý jumystar departamentiniń basshysy, aǵa ofıser Rýslan Tapashev.
Osyǵan deıin qaryzdy kóptegen kolektorlyq kompanıalar sarbazdyń týystaryna júkteıtin. Onyń ústine 1 jyl tólenbegen bereshektiń ósimpuly ósip, sarbazdyń nesıe tarıhy da nasharlaıtyn edi. Endi mundaı máseleler bolmaıdy. Qarjy naryǵyn retteý jáne damytý agenttigi bıyl barlyǵy 13 myńdaı sarbazdyń tizimi kelgenin málimdedi. Tekseristen keıin 7 myń sarbazdyń ótelmegen nesıesi bary anyqtalǵan. Qazir kredıttik kanıkýl berý úshin áli de tıisti anyqtamalar jınalyp jatyr.
«Qorǵanys mınıstrligi áskerı qyzmetshilerdiń tizimin agenttikke jiberedi. Agenttik osy tizim boıynsha, qaı áskerı qyzmetshide kredıt bar ekenin anyqtap, osy tizimdi kredıtorǵa jiberedi. Áskerı qyzmetshi óziniń qaryzdary boıynsha tólemderdi keıinge qaldyrý úshin bank nemese mıkroqarjylyq uıymdarǵa ótinishpen júginý qajet», - deıdi QR QNRDA Qarjylyq qyzmetterdi tutynýshylardyń quqyqtaryn qorǵaý departamentiniń bas mamany Bella Chıkanova.