BJZQ-men bir kún
«Biryńǵaı jınaqtaýshy zeınetaqy qory» aksıonerlik qoǵamynyń basty mısıasy – zeınetaqy jınaqtaryn senimdi esepke alý jáne árbir salymshyǵa qoljetimdi, sapaly zeınetaqy qyzmetterin kórsetý. Qor eń birinshi kezekte ár adamnyń, ıaǵnı BJZQ salymshylarynyń múddesin kózdeıdi. Sol salymshylardyń qarajatyna shashaý shyǵarmaı ıe bolyp otyrǵan, tıisti qarjylyq qyzmetter kórsetip kele jatqan «BJZQ» AQ-nyń Almaty qalasyndaǵy fılıalynyń búgingi tynys-tirshiligi qandaı? Keıingi jyldary qandaı tyń jańalyqtar oryn aldy? Biz fılıal jumysymen jaqyn tanysý úshin atalǵan irgeli mekemege at basyn burdyq.
Eń tanymal qyzmet túri
«BJZQ» AQ-nyń Almaty qalalyq fılıalynda kúndelikti jumys kúni tańerteńgilik lezdemeden bastalady. Onda fılıal dırektory Ámirenov Nurlan Slámbekuly qyzmetkerlerine árbir tutynýshyǵa sapaly qyzmet kórsete otyryp, zeınetaqy zańnamasyna engizilgen ózgeristerdi, jańa qyzmetterdi jan-jaqty túsindirýdi mindetteıdi. Sáıkesinshe árbir qyzmetker kelýshilerdi jyly júzben qarsy alyp, qajetti qyzmetterdi kórsetip, suraqtaryna jaýap beredi jáne zeınetaqy júıesinde bolyp jatqan ózgeristermen tanystyrady. Iaǵnı fılıal qyzmetkerleriniń ádettegi jumys kúni Qor keńselerinde jáne olardan tys jerde Qordyń salymshylaryna (alýshylaryna) jınaqtaýshy zeınetaqy júıesi aıasynda bilikti jáne sapaly qyzmet kórsetýden bastalady.
Bıylǵy jarty jyldyń qorytyndysy boıynsha Qordaǵy eń tanymal qyzmet – jeke zeınetaqy shottarynyń (JZSH) jaı-kúıi týraly aqparat alý. Jalpy, BJZQ qyzmetteriniń 93 paıyzdan astamy onlaın formatta kórsetiledi.
Bizde bári qoljetimdi
– Bizdiń fılıal qyzmetkerleri qaladaǵy Áýezov, Túrksib jáne Almaly aýdandarynyń aýmaǵynda ornalasqan 3 operasıalyq bólimshede eńbek etedi. Operatorlarymyz kún saıyn 600-den astam qyzmet kórsetedi. Munda 28 maman, al baryp qyzmet kórsetetin bólimde 11 adam óz mindetterin abyroımen atqaryp keledi. Bizdiń Qordyń qyzmeti megapolısten tys aımaqtarǵa da qoljetimdi. Naqtyraq aıtsaq, Esik, Qaskeleń, Talǵar, Qonaev qalalaryndaǵy, Ótegen batyr, Uzynaǵash, Shonjy, Kegen aýyldaryndaǵy salymshylarymyzǵa arnalǵan qyzmet kórsetý ortalyqtarynda derbes qyzmet kórsetiledi, – deıdi fılıal basshysy Nurlan Slámbekuly.
Shalǵaıdaǵy eldi mekenderde turatyn salymshylarǵa BJZQ qyzmetterin «Qazposhta» arqyly alýǵa da jaǵdaı jasalǵan. Máselen, 2021 jyldyń jeltoqsanynan beri Qarasaı aýdany Shamalǵan stansıasynyń jáne İle aýdany Jetigen kentiniń turǵyndary zeınetaqy jınaǵy týraly málimetterdi bilý úshin jergilikti «Qazposhta» bólimshesine júgine alady.
– Bıylǵy sáýir aıynan bastap Jambyl aýdanynyń Qarǵaly, Raıymbek aýdanynyń Narynqol, Eńbekshiqazaq aýdanynyń Báıdibek bı jáne Balqash aýdanynyń Baqanas aýyldarynda «Qazposhtanyń» taǵy tórt núktesi iske qosyldy. Ulttyq poshta operatorymen birlesken jobanyń nátıjesinde Qor salymshylary shalǵaıda turyp ta jeke derektemelerine ózgerister nemese tolyqtyrýlar engize alady, – deıdi Nurlan Ámirenov.
Áleýmetke jaqynbyz
Iá, Qor salymshylardyń óz jınaqtary týraly aqparatty jyldam alýy úshin barynsha jaǵdaı jasap keledi. BJZQ qyzmetteri táýlik boıyna, kez-kelgen jerde qoljetimdi bolýy úshin 2021 jyldyń jazynan bastap Qor mamandary Almatydaǵy Dostyq dańǵyly, 85 mekenjaıynda ornalasqan «Áleýmettik qyzmetter úıinde» de salymshylarǵa (alýshylarǵa) qyzmet kórsete bastady. Onda da zeınetaqy júıesiniń barlyq baǵyty boıynsha tolyqqandy qyzmetter kórsetiledi.
BJZQ Almaty fılıalynyń baryp qyzmet kórsetý bóliminiń bastyǵy Aıgúl Bımýrzaeva bizge Qordyń «Mobıldi agent» qyzmeti týraly aıtyp berdi. Bul qyzmet Qordyń keńsesine densaýlyǵyna baılanysty ózdiginen kele almaıtyn tutynýshylarǵa, ıaǵnı İ jáne İİ toptaǵy múmkindigi shekteýli adamdarǵa arnalǵan. Barlyq qajetti tehnıkalyq quraldarmen jaraqtalǵan «Mobıldi agent» arqyly baryp qyzmet kórsetý bóliminiń qyzmetkerleri jyl basynan beri 6 myńnan astam operasıa júrgizgen.
Jalpy, qaı sanattaǵy adam bolmasyn, barlyq salymshy BJZQ saıtynan jáne uıaly qosymshasynan táýlik boıyna kez-kelgen jerde otyryp, jeke zeınetaqy shotynan úzindi kóshirme alyp, derektemelerge ózgerister men tolyqtyrýlar engizip, bolashaq zeınetaqysynyń mólsherin shamalap esepteýine bolady. Iaǵnı bul qyzmettiń bári ashyq, árdaıym qoljetimdi degen sóz.
Búgingi kúni BJZQ-nyń Almaty qalasy fılıalynda mindetti zeınetaqy jarnalary (MZJ) esebinen ashylǵan 1 740 070 jeke zeınetaqy shoty (JZSH) bar. Bul kórsetkish MZJ aýdaratyn Qor salymshylarynyń jalpy úlesiniń 16% astamyn quraıdy. Jeke shottarda shamamen 3 trıllıon teńge jınaqtalǵan.
Budan basqa, mindetti kásiptik zeınetaqy jarnalary esebinen ashylǵan 36 238 JZSH-daǵy zeınetaqy jınaqtarynyń kólemi 18 mıllıard teńgeden asty. Sondaı-aq, qazirgi kúni erikti zeınetaqy jarnalaryn tartý boıynsha da jumystar belsendi júrgizilýde. Bul baǵytta fılıal qorynda búginde 80 myńǵa jýyq JZSH bar, olardaǵy jınaq somasy 903 mıllıon teńgeden asady.
Áleýmettik kodeks múmkindigi
Barshamyzǵa málim, bıylǵy 1 shildeden bastap elimizde múldem tyń jańa joba – Áleýmettik kodeks kúshine endi. Bul qujat adamdy týǵanynan bastap taıaqqa súıengen shaǵyna deıin áleýmettik qoldaý, jumysqa ornalasý, eńbek qaýipsizdigi, áleýmettik saqtandyrý, ómirlik qıyn jaǵdaılar týyndaǵan kezdegi kómek syndy birqatar máseleni qamtıdy. Al bul quqyqtyq aktide zeınetaqy júıesine qatysýshy salymshylarǵa qandaı múmkindikter berilgen?
– Áleýmettik kodeks zeınetaqy júıesine qatysýshy salymshylardyń ınvestısıalyq múmkindikterin arttyrady. Sol múmkindikterdiń bir bóligi – salymshylar óz aktıvterin basqarý quqyǵyn keńeıte alady. Naqtyraq aıtsaq, endi salymshylardyń mindetti zeınetaqy jarnalary (MZJ) jáne mindetti kásiptik zeınetaqy jarnalary (MKZJ) esebinen zeınetaqy jınaqtarynyń 50% aspaıtyn bóligin ınvestısıalyq portfeldi basqarýshynyń (IPB) senimgerlik basqarýyna berý múmkindigi bar. Ol úshin eń tómengi jetkiliktilik shegi eskerilmeıdi, basqarýshy kompanıany salymshy óz betinshe tańdaı alady. Al erikti zeınetaqy jınaqtary bar salymshylar zeınetaqy jınaqtarynyń 100% deıin IPB-ǵa bere alady, – deıdi «BJZQ» AQ Almaty qalalyq fılıalynyń dırektory Nurlan Ámirenov.
Bul rette memleket zeınetaqy jınaqtarynyń saqtalý kepildigin jınaqtardyń QR Ulttyq Bankiniń qaramaǵyndaǵy bóligine ǵana beretinin atap ótken jón. Al jeke basqarýǵa beriletin zeınetaqy jınaqtarynyń saqtalýyna jáne olardyń tabystylyǵyna salymshy tańdaǵan kompanıa jaýapty bolady. Sondyqtan, zeınetaqy jınaqtarynyń bir bóligin IPB-ǵa senimgerlik basqarýǵa aýdarmas buryn, naryqtaǵy basqarýshy kompanıalardyń qoldanystaǵy tizbesin qarap, olardyń BJZQ saıtyndaǵy ınvestısıalyq deklarasıalaryn, ınvestısıalyq qyzmetterine jasalǵan sholýlardy zerdelep, tańdalǵan jeke kompanıanyń tájirıbesi jáne jumys nátıjelerimen tanysyp, yqtımal táýekelderdi muqıat eskergen jón. Bul jóninde BJZQ saıtynan tolyǵyraq tanysýǵa bolady.
Jańa mindetter júkteldi
Jańa kodekste usynylǵan is-sharalar áleýmettik qorǵaý júıesin qaıta júkteýge, ony halyqaralyq standarttarǵa sáıkes etip ońtaılandyrýǵa múmkindik beredi. Zeınetke eńbek sińirgen jyldary boıynsha shyqqan azamattar emdelý jáne turǵyn úı jaǵdaılaryn jaqsartý úshin óz jınaqtaryn tolyq kólemde paıdalana alady. Bul sanatqa áskerı qyzmetshiler, arnaýly memlekettik jáne quqyq qorǵaý organdarynyń, memlekettik feldegerlik qyzmettiń qyzmetkerleri jatady. Qalǵan zeınetkerler, eger olardyń zeınetaqy tólemderiniń mólsheri 40% tómen emes deńgeıdegi tabysty almastyrý koefısıentin qamtamasyz etse, joǵaryda atalǵan maqsattarǵa mindetti zeınetaqy jarnalary esebinen qalyptastyrylǵan zeınetaqy jınaqtarynyń 50% deıin paıdalaný quqyǵyn saqtaıdy.
Osy kodekste BJZQ-nyń mindetterine jumys berýshiniń mindetti zeınetaqy jarnalaryn tartý qosymsha júktelgeninen habardarmyz. Bul týraly fılıal basshysy N.Ámirenov:
– Iá, Áleýmettik kodekstegi taǵy bir jańalyq – 2024 jyldyń 1 qańtarynan bastap BJZQ-nyń mindetterine qosymsha jumys berýshiniń mindetti zeınetaqy jarnalaryn (JMZJ) tartý júktelip otyr. JMZJ tek 1975 jylǵy 1 qańtardan keıin týǵan jumyskerler úshin jumys berýshiniń óz qarajaty esebinen júzege asyrylatyn bolady jáne jumyskerdiń aı saıynǵy tabysynan: 2024 jylǵy 1 qańtardan bastap 1,5% mólsherinde belgilenip, 2028 jyly 5% jetkenge deıin jyl saıyn 1% ulǵaıyp otyrady. JMZJ-ny osylaı kezeń-kezeńmen engizý jumys berýshige túsetin júktemeni jeńildetýge múmkindik beredi, – dedi.
TÚIİN.
Mine, Biryńǵaı jınaqtaýshy zeınetaqy qorynyń búginde senimdi qarjy ınstıtýtyna aınalǵanyn kórip otyrmyz. BJZQ basshylyǵy men qyzmetkerleri salymshylar jáne zeınetaqy jınaqtaryn alýshylar aldynda Qor qyzmetin únemi jetildirip otyrýǵa, resýrstardy únemdi ári utymdy paıdalanýǵa jaýapty. 2022 jyly BJZQ jańa Korporatıvtik damý strategıasyn qabyldaǵan bolatyn. Osy strategıa sheńberinde servısterdi odan ári avtomattandyrý, qyzmet kórsetýdiń belsendi formatyn damytý boıynsha jumystar qarqyndy jalǵasýda.