Atom stansıalary jańartylatyn energıa kózderine qaraǵanda paıdaly áser koefısıenti boıynsha shamamen bes ese artyq.
Iadrolyq fızıka ınstıtýtynyń bas ınjeneriniń orynbasary Asqat Bekbaev kóptegen áriptesteri sıaqty jańartylatyn energıa kózderin sheshýshi balama retinde qarastyrmaıdy.
"Atom elektr stansıasynyń 2,8 gıgavattyq qýatymen paıdaly áser koefısıenti (PÁK) 90% quraıdy. Al kún panelderin qoldanǵanda, PÁK kórsetkishi 20%-dan aspaıdy. Kún panelderinen dál osyndaı qýat alý úshin 29 myń gektar jer qajet. Onyń ústine, panelderdi únemi tazalap turý kerek, áıtpese olardyń PÁK odan ári tómendeıdi. Sonymen qatar, atom elektr stansıalarynyń qyzmet etý merzimi 60-80 jyl bolsa, kún panelderi 15-20 jyl ǵana jumys isteıdi", – dedi spıker.
Asqat Bekbaev kelesi derekterdi keltirdi:
"Fransıa Qazaqstannan bes ese kishi bolsa da, onda 56 reaktor ornalasqan. Bul ekologıalyq qaýip-qaterlerdi azaıtýǵa baǵyttalǵan sharalardyń aıqyn mysaly. Ońtústik Koreıa, terıtorıasy tek Almaty oblysymen shamalas bolǵanymen, onda 26 reaktor jumys istep tur. Ońtústik Koreıa ónerkásiptik damý, ekonomıkalyq ósý deńgeıi boıynsha álemdegi jetekshi elderdiń biri bolyp tabylady jáne kóptegen baǵyttar boıynsha ónim óndirýde kósh bastap keledi. Mundaı kórsetkishterge el atom energetıkasyn damytý arqyly da qol jetkizdi", – dep qorytyndylady Iadrolyq fızıka ınstıtýtynyń bas ınjeneriniń orynbasary.
Bul málimetter atom elektr stansıasynyń joǵary tıimdiligi men uzaq qyzmet etý merzimi onyń jańartylatyn energıa kózderine qaraǵanda aıtarlyqtaı artyqshylyqqa ıe ekenin kórsetedi. Qazaqstannyń energetıkalyq áleýetin arttyrý úshin atom energetıkasyn damytý mańyzdy qadam bolýy múmkin.