Qazaqstan Respýblıkasy Parlamenti Senatynyń depýtaty Sultan Dúısembınov Almaty oblysynyń Talǵar aýdanynyń zıaly qaýym ókilderimen, kásipkerlermen, agrarshylarmen jáne jastarmen kezdesý ótkizdi.
Kezdesýdiń basty taqyryby Qazaqstanda atom elektr stansıasyn (AES) salý boldy. Senator óz sózinde AES salý máselesi elimizdiń energetıkalyq máselelerin sheshýde mańyzdy qadam ekenin atap ótti. Dúısembınovtyń aıtýynsha, AES Qazaqstanǵa elektr energıasyna ósip jatqan suranysty qanaǵattandyrýǵa ǵana emes, bolashaqta turaqty ekonomıkalyq ósimniń negizi bolýǵa da kómektesedi.
"Atom elektr stansıasy Qazaqstannyń kómirtekti energıa kózderine táýeldiligin azaıtady, bul óz kezeginde eldegi ekologıalyq jaǵdaıdyń jaqsarýyna yqpal etedi. AES tóńiregindegi ınfraqurylymdy damytý jańa jumys oryndarynyń ashylýyna jáne aımaqtyń damýyna serpin beredi", - dep atap ótti Sultan Dúısembınov.
Senator halyqaralyq tájirıbede atom energıasyn paıdalaný máselesine keńinen toqtalyp, onyń ekologıalyq artyqshylyqtaryn basa aıtty. Ol atom energetıkasyna kóshý kómirtegi shyǵaryndylaryn azaıtýǵa jáne klımat ózgeristerimen kúresýge múmkindik beretinin, bul qazirgi ekologıalyq syn-qaterler jaǵdaıynda asa mańyzdy ekenin túsindirdi.
Kezdesý sońynda Sultan Dúısembınov Talǵar aýdanynyń turǵyndaryn aldaǵy 6 qazanda ótetin referendýmǵa belsendi qatysyp, AES salý máselesi boıynsha óz azamattyq ustanymdaryn bildirýge shaqyrdy.