Ulttyq kınony qoldaý ortalyǵynyń qoldaýymen túsirilgen «Baýyryna salý» fılmi prokatqa shyqty, dep habarlaıdy almaty-akshamy.kz.
Fılm ájesiniń qolynda ósken jetkinshektiń oqıǵasyn baıandaıdy. Ájesi qaıtys bolǵannan keıin ol óziniń ata-anasyna oralýǵa jáne oǵan bóten adamdarmen jańa ortada qarym-qatynas qurýǵa májbúr bolady.
«Bul – ishinara meniń jeke ómirimnen alynǵan oqıǵa. Men de ájemniń qolynda óstim, meni tárbıelegen sol kisi. Osy máseleni jiti zerttedim. Mundaǵy basty nárse – ata-anamen balanyń qarym-qatynasy. Ata-ájesiniń qolynda ósken kez-kelgen bala óz ata-anasyn «áke» ne «ana» dep atamaıdy. Nege olaı? Ár sondaı balanyń ishinde «meni tastap ketken» degen renish bar. Fılmniń dramatýrgıasy, eski otbasynan aıyrylǵannan keıin áli de jańa otbasy tabý múmkindigi bar ekenin kórermenge jetkizý», – deıdi rejıser.
Kýchınchırekovtiń ózi bul jobada rejıser, senarıst jáne prodúser retinde jumys istedi. Túsirilimniń negizgi lokasıalary – Almaty oblysyndaǵy Quıǵan jáne Tuıyq aýyldary. Qoıýshy-operatory Janarbek Eleýbek.
Avtorlar fılmniń tusaýkeserin iri halyqaralyq kınofestıvalderde ótkizdi. Rejıserdiń aıtýynsha, bul týyndy – qazaq halqynyń salt-dástúrine degen erekshe qurmet.